logo
ENG



ადმინისტრაცია: პრეზიდენტი უსმენს ყველას, მართავს შეხვედრებს, პროცესი ღია და გამჭვირვალეა

20 დეკ 202121:05
3 წუთის საკითხავი
 
ადმინისტრაცია: პრეზიდენტი უსმენს ყველას, მართავს შეხვედრებს, პროცესი ღია და გამჭვირვალეა
პრეზიდენტის ადმინისტრაცია

პრეზიდენტის ადმინისტრაცია ეროვნული თანხმობის პროცესთან დაკავშირებით განცხადებას ავრცელებს და აღნიშნავს, რომ პროცესი ღია და გამჭვირვალეა და ის საიდუმლო ხასიათს არ ატარებს. 

ადმინისტრაციაში ამბობენ, რომ ბოლო დღეების განმავლობაში ვრცელდება სხვადასხვა ინფორმაცია, რომლის წყაროც თავად არ არიან.

"პრეზიდენტის ინიციატივით წამოწყებული ეროვნული თანხმობის პროცესი არის რთული კომპლექსური პროცესი, რომელიც არის ღია და გამჭვირვალე და არანაირად არ ატარებს საიდუმლო ხასიათს. ბოლო დღეებია ვრცელდება სხვადასხვა ინფორმაცია, რომლის წყაროც არ არის პრეზიდენტის ადმინისტრაცია.

ეროვნული თანხმობის პროცესის დასაწყისში პრეზიდენტი უსმენს ყველას, მართავს შეხვედრებს და დაინტერესებულია სხვადასხვა საზოგადოებრივი ჯგუფების მოსაზრებებით, ინიციატივებითა თუ პოზიციებით, ეს ყოველივე არის ერთი მთლიანი ეროვნული თანხმობის პროცესის ნაწილი.

აღსანიშნავია ის ფაქტი, რომ ამ პროცესში ჩართულები არიან არა მხოლოდ პოლიტიკური პარტიები, არამედ საზოგადოება და  მათ შორის, მსხვერპლთა საკითხებზე მომუშავე არასამთავრობო ორგანიზაციების წარმომადგენლები.

საქართველოს პრეზიდენტმა შეხვედრები უკვე გამართა საქართველოს პატრიარქთან, საქართველოს მეოთხე პრეზიდენტთან, გიორგი მარგველაშვილთან და პოლიტიკური პარტიების წარმომადგენლებთან. პროცესი გრძელდება და პრეზიდენტი შეხვედრებს აქტიურ რეჟიმში განაგრძობს", - ნათქვამია განცხადებაში.

საქართველოს პრეზიდენტი სალომე ზურაბიშვილი აშშ-ის პრეზიდენტ ჯო ბაიდენის მიერ ორგანიზებულ დემოკრატიის სამიტზე საქართველოს სახელით წარსდგა და თქვა, რომ პოლარიზაციის და სიძულვილის დაძლევა აუცილებელია და როგორც საქართველოს პრეზიდენტი, ეროვნული მასშტაბით წამოიწყებს საუბარს ისტორიის საერთო აღქმის მისაღწევად.

ამის შემდეგ, პრეზიდენტმა სალომე ზურაბიშვილმა წინასაახალწლო მიღებაზე პარტიებს "ეროვნული თანხმობის" მიღწევის მისი ხედვა გააცნო.


close დახურვა