ალასანია სააკაშვილზე: სასამართლო პროცესზე ჩართვას აპირებს

მიხეილ სააკაშვილის დედა, გიული ალასანია ამბობს, რომ მიხეილ სააკაშვილის დღევანდელ პროცესზე "ჩართვას აპირებს".

"აპირებს ჩართვას, ახლა პროცესი იწყება, თუ მისცა ჯანმრთელობის მდგომარეობამ შესაძლებლობა. ყოველ შემთხვევაში, თვითონ განწყობილია, რომ ჩაერთოს."- განაცხადა ალასანიამ.

მისი თქმით, მიხეილ სააკშვილს "საწამლავი ისევ ორგანიზმში აქვს."

"ადამიანს აქვს შავი ფერი აბსოლუტურად [...] საწამლავი ისევ აქვს ორგანიზმში, ნევროლოგიური მდგომარეობა ისევ იგივეა, არაფერი დაძრულა."- ამბობს გიული ალასანია.

* * *
დღეს 12:30 საათზე მიხეილ სააკაშვილისთვის სასჯელის გადავადების, ან სასჯელისგან გათავისუფლების მორიგი სასამართლო პროცესი გაიმართება.

მიხეილ სააკაშვილის ადვოკატის, შალვა ხაჭაპურიძის ცნობით, დღევანდელ სხდომაზე დაცვის მხარე ცენტრი ემპათიას ექსპერტებს გამოკითხავს.

ბრალდების მხარე კი სამხარაულის ექსპერტიზის ბიუროს ექსპერტების გამოკითხვას გეგმავს.

სააკაშვილის ოჯახის წევრები და ადვოკატები მის უცხოეთში  სამკურნალოდ გადაყვანას ითხოვენ - 12 დეკემბერს სტრასბურგში გამართულ პრესკონფერენციაზე კი, ევროპარლამენტარებმა მირიამ ლექსმანმა და ანა ფოტიგამ კიდევ ერთხელ მოუწოდეს ქართულ ოცნებას, გათავისუფლდეს სააკაშვილი ჯანმრთელობის მდგომარეობის გამო.

ამერიკაში ჩატარებულ ტოქსიკოლოგიურ ექსპერტიზაში, რომელსაც პროფესორი დეივიდ სმიტი აწერს ხელს, წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.

გარდა ამისა, 24 დეკემბერს შაბათის ფორმულამ მოიპოვა სააკაშვილის ტოქსიკოლოგიური ექსპერტიზის დასკვნა, რომლის ერთ-ერთ პირველ გვერდზე მითითებულია იმ მედიკამენტების ჩამონათვალი, რომლითაც მიხეილ სააკაშვილს სხვადასხვა სამედიცინო დაწესებულებაში მკურნალობდნენ. მათ შორის არის ისეთი მედიკამენტებიც, რომლებსაც დეივიდ სმიტი საშიშ მედიკამენტებს უწოდებს და მიუთითებს, რომ პრეპარატები ამერიკის შეერთებული შტატების საკვებისა და წამლების ადმინისტრაციის (FDA) ან მსოფლიო ჯანდაცვის ორგანიზაციის (WHO) მიერ დამტკიცებული არ არის. სააკაშვილისთვის დანიშნული 14 მედიკამენტიდან, ასეთი ჩამონათვალში 2 წამალია. საერთაშორისო სტანდარტით აკრძალულ მედიკამენტებზე ექსპერტი დასკვნაში წერს, რომ პრეპარატები შესაძლებელია "ბოროტად" იყოს გამოყენებული, რამაც შესაძლებელია გამოიწვიოს მწვავე მოწამვლა.

რაც შეეხება ომბუდსმენის კონსილიუმის დასკვნას, მიხეილ სააკაშვილის მდგომარეობა მე-4 ხარისხის კახექსიით არის შეფასებული და ის სხვა ქვეყნის მრავალპროფილურ კლინიკაშია გადასაყვანი.

14 დეკემბერს ევროპარლამენტის მიღებულ რეზოლუციაში, მათ შორის, საუბარია მიხეილ სააკაშვილის განთავისუფლების და სამკურნალოდ საზღვარგარეთ გადაყვანის საკითხზე. ევროპარლამენტი მოუწოდებს საქართველოს პრეზიდენტს, სალომე ზურაბიშვილს გამოიყენოს თავისი კონსტიტუციური პრეროგატივა მიხეილ სააკაშვილის საკითხის მოსაგვარებლად.