დაავადებათა კონტროლის ეროვნული ცენტრის დირექტორი, ამირან გამყრელიძე აცხადებს, რომ ე.წ მაიმუნის ვირუსი არაა სხვა რესპირაციული ვირუსების მსგავსად გავრცელებადი, ამიტომ ვირუსთან დაკავშირებით პანიკის საფუძველი არ არსებობს. ამის შესახებ გამყრელიძემ საზოგადოებრივ მაუწყებელთან ინტერვიუში ისაუბრა.
გამყრელიძე აცხადებს, რომ ჯანდაცვის მსოფლიო ორგანიზაციამ (WHO) საერთაშორისო მნიშვნელობის მქონე საზოგადოებრივი ჯანმრთელობის განსაკუთრებული მდგომარეობა დიდი დისკუსიის შემდეგ გამოაცხადა. მისი თქმით ეს არა პანდემია, არამედ გარკვეულ ჯგუფებში კონცენტრირებული ეპიდემიაა. თუმცა გამყრელიძე აღნიშნავს, რომ ქვეყნები მისი დიაგნოსტირებისა და ზედამხედველობისთვის მზად უნდა იყვნენ.
„მაიმუნის ყვავილი“ არ არის ისეთი გავრცელებადი, როგორც სხვა რესპირაციული ვირუსული დაავადებები, ამიტომ პანიკის საფუძველი არ არის. ეს არ არის საგანგებო მდგომარეობა, ეს არის საერთაშორისო მნიშვნელობის მქონე საზოგადოებრივი ჯანმრთელობის განსაკუთრებული მდგომარეობა. საკმაოდ დიდი დისკუსია იყო, გამოცხადებულიყო თუ არა. ივნისში ჯანმრთელობის საერთაშორისო წესების კომიტეტმა ეს საკითხი განიხილა და მაშინ არ იქნა მიღებული გადაწყვეტილება, რომ გამოცხადებულიყო. მაშინ იყო შემთხვევების რაოდენობა 3 000-მდე და 47 ქვეყანაში.
ამ ერთი თვის განმავლობაში შემთხვევების რაოდენობამ მოიმატა, 16 000-ზე მეტია 75 ქვეყანაში. იყო ისევ ორი დღის წინ ამ კომიტეტის სხდომა, სადაც კონსენსუსი ვერ მოხერხდა. ნაწილი გამოცხადებას ემხრობოდა, ნაწილი არა. შემდგომ ხელმძღვანელმა მიიღო გადაწყვეტილება გამოცხადების შესახებ. მისი დასაბუთება გახლავთ ის, რომ ეს არ არის პანდემია. არის კონცენტრირებული ეპიდემია გარკვეულ ჯგუფებში, მაგრამ მაინც საჭიროა, რომ გაძლიერდეს ზედამხედველობა, დიაგნოსტიკა, ქვეყნების შესაძლებლობა და ეს გადაწყვეტილება მიიღეს“,- თქვა გამყრელიძემ.
ამირან გამყრელიძე აცხადებს, რომ საქართველოში "მაიმუნის ვირუსთან" დაკავშირებით პანიკის საფუძველი არ არსებობს, ვინაიდან 21 დღეა ვირუსის შემთხვევა არ დაფიქსირებულა, ანუ ვირუსი არ გავრცელებულა, ინფიცირებული 1 ადამიანი კი უკვე განიკურნა.
დაავადებათა კონტროლის ცენტრის დირექტორი აცხადებს, რომ საქართველო ინფიცირების შემთხვევების ამოცნობისა და მკურნალობისთვის მზადაა.
„დიაგნოსტიკის და გამოვლენის მზადყოფნა უნდა იყოს ანუ რაც ჩვენ გავაკეთეთ უკვე მაისში, როდესაც გავაძლიერეთ ზედამხედველობა. ამ ხნის განმავლობაში 10 სავარაუდო შემთხვევა იქნა აღრიცხული ქვეყანაში და აქედან, 9 უკუგდებული იქნა. გაძლიერებულია მზადყოფნა, შემუშავებულია რამდენიმე დოკუმენტი, რომელიც განსაზღვრავს როგორც ზედამხედველობას, ასევე იმას, თუ როდის უნდა იქნას ეჭვი მიტანილი და ა.შ ინკუბაციის პერიოდი 21 დღემდე გრძელდება, ძირითადად მაინც არის 5-16 დღის პერიოდში.
ის მიმდინარეობს გამონაყარით, რომელსაც სჭირდება დიფერენცირება. დამახასიათებელია ტემპერატურის მომატება“,- განაცხადა გამყრელიძემ.
ჯანდაცვის მსოფლიო ორგანიზაციამ ე.წ. მაიმუნის ყვავილთან დაკავშირებით ჯანდაცვის სფეროში გლობალური საგანგებო მდგომარეობა გამოაცხადა.
შეგახსენებთ, რომ 15 ივნისს საქართველოში მაიმუნის ყვავილის ვირუსის პირველი შემთხვევა დაფიქსირდა.
დახურვა