ბელარუსის დედაქალაქ მინსკში ანტისამთავრობო მასშტაბური აქციები გრძელდება, - ამის შესახებ Belsat იუწყება.
მედიასაშუალების ინფორმაციით, აქციაში სხვადასხვა უნივერსიტეტების სტუდენტები მონაწილეობენ.
თავდაპირველად აქცია მშვიდობიანად მიმდინარეობდა, თუმცა მოგვიანებით სამართალდამცველებმა ერთ-ერთ კაფესთან 15 სტუდენტი დააკაკვეს. შსს-ს ცნობით, მილიციამ სულ 30-მდე ადამიანი დააკავა.
გარდა ამისა, პროტესტის 28-ე დღეს ქალებმა მშვიდობიანი პიკეტი მოაწყეს.
მედია აგრეთვე Belsat-ის 2 ჟურნალისტის დაკავებაზე წერს, რომლებიც აქციაზე იმყოფებოდნენ და მშვიდობიან მსვლელობას პირდაპირ ეთერში აშუქებდნენ.
ცნობისთვის, 9 აგვისტოს საპრეზიდენტო არჩევნების შემდეგ ბელარუსში საპროტესტო გამოსვლები არ წყდება. არჩევნების შედეგები თავისუფალი სამყაროს არც ერთ სახელმწიფოს არ უღიარებია.
ევროპული საბჭოს სხდომაზე არჩევნების შედეგები არ ცნო ევროკავშირის წევრმა არც ერთმა ქვეყანამ. ევროკავშირი პერსონალურ სანქციებს გეგმავს იმ პირების წინააღმდეგ, რომლებიც ძალადობაზე, რეპრესიებსა და არჩევნების გაყალბებაზე არიან პასუხისმგებელნი.
ცესკოს პირველადი მონაცემებით, ლუკაშენკომ არჩევნებზე 80.23% მოიპოვა.ლუკაშენკოს მთავარმა ოპონენტმა, სვეტლანა ტიხანოვსკაიამ 10%-ის მოპოვება შეძლო.
ეგზიტპოლის გამოქვეყნების შემდეგ, მოსახლეობა გარეთ გამოვიდა. ისინი პირველად შედეგებს აპროტესტებდნენ. ანტისამთავრობო აქციაზე მომიტინგეებს სპეცრაზმი დაუპირისპირდა, რა დროსაც ათობით ადამიანი დაშავდა. მას შემდეგ ბელარუსში ლუკაშენკოს საწინააღმდეგო აქციები არ წყდება.
მომიტინგეები ამბობენ, რომ არჩევნები გაყალბებულია და ლუკაშენკოს გადადგომას ითხოვენ. ანტისამთავრობო აქციებზე მიღებული დაზიანებების შედეგად 4 ადამიანი დაიღუპა, ათასობით კი დააკავეს.
დახურვა