თურქეთის პრეზიდენტის, რეჯეფ თაიფ ერდოღანის თქმით, რუსეთის მხრიდან ინციდენტში მონაწილეობის უარყოფა და ასევე აშშ-ის პრეზიდენტის განცხადება, რომ ეს რუსული წარმოების რაკეტა არ ყოფილა იმაზე მიუთითებს, რომ რუსეთს პოლონეთში მომხდართან კავშირი არ აქვს.
ბალიში დიდი ოცეულის სამიტის პრესკონფერენციაზე ერდოღანმა განაცხადა, რომ ის "აფასებს" რუსეთის განცხადებას, რომ რუსული რაკეტები პოლონეთის ტერიტორიაზე არ ჩამოვარდნილა. თუმცა თურქეთის პრეზიდენტის თქმით, შემთხვევა უნდა გამოიძიონ.
„რუსეთი აცხადებს, რომ ამასთან [პოლონეთში აფეთქებასთან] კავშირი არ აქვთ, ბაიდენი ამბობს, რომ ეს რაკეტები არაა რუსული წარმოების, ეს აჩვენებს, რომ რუსეთი ამასთან არაფერ შუაშია...
ჩვენ სერიოზულად ვიღებთ რუსეთის განცხადებას, რომ ისინი მომხდართან არ არიან კავშირში.
ამ დილით როცა მე შევხვდი გერმანიის კანცლერს, ოლაფ შოლცს ჩვენ ასევე შევთანხმდით, რომ დამატებითი გამოძიებაა საჭირო“ - განაცხადა ერდოღანმა.
პოლონეთის ტერიტორიაზე, 15 ნოემბერს უკრაინის საზღვართან ახლოს მდებარე ქალაქ ლულინში 2 რაკეტა ჩამოვარდა. პოლონეთი ადასტურებს, რომ მათ ტერიტორიაზე რუსული წარმოების რაკეტა ჩამოვარდა.
პოლონეთის საგარეო საქმეთა სამინისტრომ გაავრცელა განცხადება, სადაც ამბობს, რომ "15:40 საათზე პოლონეთ-უკრაინის საზღვართან, რუსული წარმოების რაკეტა ჩამოვარდა, რის შედეგადაც პოლონეთის რესპუბლიკის ორი მოქალაქე დაიღუპა".
შემთხვევასთან დაკავშირებით, პოლონეთის საგარეო საქმეთა მინისტრმა რუსეთის ელჩი დაიბარა და "მოითხოვა სასწრაფო, დეტალური განმარტებები".
პოლონეთს პრემიერმინისტრმა "კრიზისული სიტუაციის გამო" უსაფრთხოებისა და თავდაცვის კომიტეტის სასწრაფო სხდომა მოიწვია.
რუსეთის საგარეო საქმეთა სამინისტრო უარყოფს ინფორმაციას და ამბობს, რომ გავრცელებული ცნობები "მიზანმიმართული პროვოკაციაა ესკალაციის მიზნით".
პოლონეთმა დაადასტურა, რომ მომხდარი აფეთქების შედეგად დაიღუპა ორი ადამიანი და მომხდარის გამო, სამხედრო მზადყოფნის გაზრდის შესახებ განაცხადა.
მომხდარის შემდეგ, პოლონეთის პრეზიდენტი ანდჟეი დუდა NATO-ს გენერალურ მდივანს იენს სტოლტენბერგს ესაუბრა. სტოლტენბერგის თქმით, ალიანსი აკვირდება სიტუაციას და მნიშვნელოვანია, რომ სწრაფად დადგინდეს ფაქტები.
ახლა მსოფლიო ლიდერები აცხადებენ, რომ უნდა გაირკვას დეტალები, თუ რა მოხდა. აშშ-ის პრეზიდენტმა, ჯო ბაიდენმა კი თქვა, რომ ნაკლებადსავარაუდოა, რაკეტები რუსეთიდან ყოფილიყო გაშვებული.
გამოცემა Associated Press სამ ამერიკელ ოფიციალურ პირზე დაყრდნობით აცხადებს, რომ პოლონეთში ჩამოვარდნილი რაკეტა, სავარაუდოდ, უკრაინელმა სამხედროებმა გაუშვეს, რათა რუსული რაკეტა ჩამოეგდოთ.
AP-ის თქმით, რაკეტა უკრაინელმა სამხედროებმა ესროლეს მოახლოებულ რუსულ რაკეტას ენერგო ინფრასტრუქტურის ობიექტებზე მასიური თავდასხმის დროს, რომელიც წინა დღეს განხორციელდა.
დახურვა