სერბეთის პრეზიდენტმა ალექსანდარ ვუჩიჩმა განაცხადა, რომ BRICS-ის ყოველწლიურ სამიტს არ დაესწრება.
გრაფიკთან დაკავშირებული მიზეზების გარდა, ვუჩიჩმა განმარტა, რომ სთხოვა ვლადიმირ პუტინს გაეგო, რომ პირადად სამიტს არ დაესწრებოდა. ვუჩიჩს შეხვედრები აქვს დაგეგმილი საბერძნეთისა და პოლონეთის პრემიერმინისტრებთან, ასევე, ევროკომისიის პრეზიდენტთან.
რუსეთში პირადად ჩასვლის ნაცვლად, ვუჩიჩმა სერბულ სახელმწიფო ტელეარხს განუცხადა, რომ მთავრობიდან ოთხ მაღალჩინოსანს გააგზავნის.
ვუჩიჩის თქმით, ეს ვიზიტებიც რომ არა, მისთვის რთული იქნებოდა ჩასვლა სხვადასხვა მიზეზის გამო, რაც პუტინისთვის ცნობილია.
"პრეზიდენტ პუტინთან ძალიან გულწრფელი ვიყავი", - თქვა მან.
პუტინი BRICS-ის ყოველწლიურ სამიტს ყაზანში 22-24 ოქტომბერს მიიღებს. BRICS-ის ჯგუფი, რომელშიც ბრაზილია, რუსეთი, ინდოეთი, ჩინეთი და სამხრეთ აფრიკა შედიან, იანვარში გაფართოვდა და მასში ირანი, არაბთა გაერთიანებული საამიროები, ეთიოპია და ეგვიპტე გაწევრიანდნენ.
სერბეთი ის იშვიათი ქვეყანაა ევროპაში, რომელიც უკრაინაში ომის გამო კრემლის წინააღმდეგ დასავლურ სანქციებს არ შეუერთდა. ამავე დროს, სერბეთი უკრაინაში შეჭრას გმობს, თუმცა რუსეთის წინააღმდეგ წასვლისგან თავს იკავებს.
დახურვა