logo
ENG



თუ იქნება მასიური ზრდა, შესაძლოა გადავიდეთ ბინაზე მკურნალობაზეც - ცერცვაძე

25 აპრ 202022:36
3 წუთის საკითხავი
clock 584

ინფექციური საავადმყოფოს დირექტორი თენგიზ ცერცვაძე აცხადებს, რომ ამ ეტაპზე ქვეყანას აქვს 600 საწოლი და შეუძლია, რომ ყოველ პაციენტს ჰქონდეს ინდივიდუალური მომსახურება სამედიცინო პერსონალის მხრიდან.

ცერცვაძის განმარტებით, პაციენტების მკვეთრი ზრდის შემთხვევაში არის გეგმა იმისთვისაც, რომ მობილიზდეს 10 ათასი საწოლი და მსუბუქი პაციენტების მკურნალობა მოხდეს ბინაზე.

„დღეს არსებული 11 კლინიკის ფონდი არის 600 საწოლი - ერთ ამდენს კიდევ გავუძლებთ გაფართოების გარეშე. ამის შემდეგ არის გეგმა, რომ საქართველო უპრობლემოდ შეძლებს 2000-მდე საწოლის მობილიზებას, ექსტრემალურ მდგომარეობაში კი გვპირდებიან 10 ათას საწოლს. არ ვიცი, 10 ათასის მობილიზება როგორ მოხდება, მაგრამ 2 000-მდე როგორ მობილიზდება, ნათელია ჩემთვისაც, მიუხედავად იმისა, რომ ეს სამინისტროს კომპეტენციაა. უპრობლემოდ გაძლება ნიშნავს, რომ ყველა პაციენტი არის ინდივიდუალური მოვლის ქვეშ - ჩვენთან 8 საათში ყველაფერი უკეთდება, როცა აშშ-ში კვირები სჭირდება. ექვსასი საწოლის ზემოთ ასეთი რესურსი არ იქნება საკმარისი. თუკი გაიზრდება ამაზე მეტად პაციენტების რაოდენობა, გადავალთ დასავლურ მოდელზე - შეიძლება ბინაზე მკურნალობაც დადგეს მსუბუქ და უსიმპტომო პაციენტებთან, თუ იქნება მასიური ზრდა და იქნება ასეულობით ზრდა", - განაცხადა თენგიზ ცერცვაძემ გადაცემაში "ჯანმრთელობის ფორმულა".

შეგახსენებთ, რომ ბოლო მონაცემებით ქვეყანაში ინფიცირების 456 შემთხვევაა დაფიქსირებული - აქედან 139 პაციენტი გამოჯანმრთელდა, ხოლო 5 გარდაიცვალა.

ქვეყანაში პირველი ინფიცირების შემთხვევა 26 თებერვალს დადასტურდა.


close დახურვა