რესპუბლიკური პარტიის წევრი, თამარ კორძაია აცხადებს, რომ საჭიროა, ხელისუფლების წარმომადგენლები დმანისში ჩავიდნენ და სიტუაცია განმუხტონ, ამასთან, მოხდეს დამნაშავეების იდენთიფიცირება. იგი, ასევე აღნიშნავს, რომ დმანისში არსებული სიტუაცია, შესაძლოა, ეთნიკურ დაპირისპირებაშიც გადაიზარდოს.
"ყველა დიდი კონფლიქტი ყოველთვის ყოფით ნიადაგზე იწყება. შევახსენებ, ბოლო კონფლიქტიც ისრაელში ყოფით ნიადაგზე დაიწყო... აქედან გამომდინარე, არ შეიძლება, მსუბუქად შევხედოთ ყოფით ნიადაგზე წარმოშობილ კონფლიქტებს. ძალიან დაძაბული ვითარებაა დმანისში, რომელიც მართლაც, შეიძლება, ეთნიკურ დაპირისპირებაში გადაიზარდოს.
განცხადებების გაკეთებას, ჯობს ხელისუფლების წარმომადგენლები დმანისში ჩავიდნენ და დაეხმარონ საზოგადოებას კონფლიქტის მოგვარებაში.
აუცილებელია სწორი კვალიფიკაცია და დამნაშავეების იდენთიფიცირება. კონფლიქტი დაიწყო გუშინ, კონფლიქტში დამნაშავეები არიან ისინი, ვინც მიუვარდნენ მაღაზიის მესაკუთრეებს", - ამბობს კორძაია.
დმანისში ადგილობრივები უკვე მეორე დღეა, ერთმანეთს ფიზიკურად უპირისპირდებიან.
დაპირისპირებამ დღეს, 17 მაისს უფრო ფართო მასშტაბი მიიღო.
დმანისის ერთ-ერთ ქუჩაზე შეკრებილი მოსახლეობის ნაწილი თოხებით და ხელკეტებით არის შეიარაღებული. ერთმანეთს დაუშინეს ქვებიც.
ადგილზე მობილიზებულია პოლიცია. დააკავეს რამდენიმე ადამიანი.
ვითარება მას შემდეგ დაიძაბა, რაც დმანისში აქციის ჩატარება სცადეს ეთნიკურად აზერბაიჯანელებმა, რომლებიც გუშინდელი დაპირისპირების დროს დაშავდნენ. მათ წინააღმდეგ დმანისშივე მცხოვრები ეთნიკურად ქართველები გამოვიდნენ.
16 მაისს ინციდენტი სურსათის ერთ-ერთ მაღაზიაში მომხდარის შემდეგ დაიწყო. გამყიდველი და მეპატრონე ყვებიან, რომ ინციდენტი პროდუქტის ვალად გატანის მოთხოვნას მოჰყვა.
საიდა ისმაილოვას თქმით, მან რამდენიმე მოქალაქეს ლუდის ნისიად მიცემაზე უარი უთხრა, რადგან მათ წარსულში აღებული ვალიც არ ჰქონდათ დაბრუნებული. ნისიაზე უარის თქმის მას სიტყვიერი შეურაცხყოფა მიაყენეს და დაემუქრნენ.
მაღაზია ეთნიკურად აზერბაიჯანელებს ეკუთვნით.
შეურაცხყოფისა და მუქარის გამო მაღაზიის მეპატრონის ოჯახის წევრი და ეს მოქალაქეები ერთმანეთს დაუპირისპირდნენ, რასაც პოლიციის გამოძახება და ადგილზე ვითარების განმუხტვა მოჰყვა.
მოგვიანებით კი მაღაზიასთან ინციდენტში მონაწილე პირები ადგილზე დიდ ჯგუფთან ერთად დაბრუნდნენ, რის შემდეგაც მათსა და მაღაზიასათან შეკრებილებს შორის ხელჩართული ჩხუბი დაიწყო.
კადრებში ჩანს, რომ ადამიანები ერთმანეთს ხის ხელკეტებით უპირისპირდებიან. ჩხუბში მონაწილე რამდენიმე ადამიანი დაშავდა, მათ პირველადი დახმარება გაეწიათ. გუშინდელ ჩხუბში ჩართული მოქალაქეები პოლიციაშიც გამოჰკითხეს.
დახურვა