ნაციონალური მოძრაობის წევრი, ნიკა მელია პარტიაში ბორდის შესაძლო შექმნასთან დაკავშირებით განცხადებას ავრცელებს და ამბობს, რომ არ იქნება იქ, სადაც "არაფორმალური მმართველობა" იარსებებს.
"ჟურნალისტები მეკითხებიან პარტიაში ბორდის შექმნასა და მოლაპარაკებების არსებობა არარსებობაზე, რაზეც მინდა საჯაროდ ვთქვა ჩემი პასუხი:
არ და ვერ ვიქნები იქ, სადაც იქნება არაფორმალური მმართველობა, სადაც იქნება ვანო მერაბიშვილისა და დავით კეზერაშვილის მავნე გავლენა. სადაც არსებობენ ეს ადამიანები, არსებობს საზოგადოებაში მათი უმძიმესი რეპუტაციული პრობლემები, სადაც არსებობს მათი გავლენა პროცესზე - მათი დრომოჭმული და საზოგადოებისგან აბსოლუტურად დაშორებული ხედვები, ვერასოდეს მოვა გამარჯვება.
ვერ შეიქმნება დამოუკიდებელი, ხალხის ინტერესზე მორგებული ვერანაირი ბორდი, თუ არსებულ ვითარებაში, მენეჯმენტი სრული შემადგენლობით, სიმაღლის მიხედვით მწკრივში ეწყობა და ჯანსაღ რჩევებზე აკითხავს პარტიის დირექტორ კეზერაშვილს...ერთიანობა ძალაა, თუ სწორ და უღალატო ხალხთან გაქვს ერთობა.... და მსგავსი ერთობის მომხრე ყოველთვის ვიყავი ვარ და ვიქნები...ხოლო ერთობა თუ ფულის გამომუშავებისთვის, სიისა და საპარლამენტო მანდატისთვის დგება, იქ არაფერი მესაქმება...არაფერი მესაქმება, არსად სადაც ხალხის ინტერესი და მისი განხორციელება არაა მთავარი. ვიქნები იმ ხალხთან ერთად, ვისთან ერთადაც ბრძოლა და გამარჯვება არის შესაძლებელი", - წერს ის.
ის წერს, რომ გამოიყენებს "სწორ ადამიანებთან, სწორი მიზნის გარშემო ერთობის და გამარჯვებისათვის ბრძოლის ყველა შანსს". მისი თქმით, ნაციონალურ მოძრაობასთან ერთადერთი პირობა აქვს - "არაფორმალური მმართველობის დასრულება პარტიაში".
"სხვა ყველა შემთხვევაში, რა სახელიც არ უნდა ერქვას პლატფორმას, რომელიც გახლეჩვაზე, ხალხის განსხვავებული აზრის გამო დევნაზე არის ორიენტირებული, ვერასოდეს დაამარცხებს ივანიშვილს, თეორიულადაც კი...
ივანიშვილს დაამარცხებს მართალი, პრინციპული, შედეგზე და არა სკამზე, ფულსა და თანამდებობაზე, ორიენტირებული ხალხი", - აცხადებს მელია.
მანამდე მელიას უსაუბრია იმაზე, რომ არ გამორიცხავს პარტიის დატოვებას. მელიას თქმით, თუ დარწმუნდა, რომ ერთი პარტიული ნიშნის ქვეშ ბრძოლა შეუძლებელია, " სხვა პლატფორმით გააგრძელებენ ბრძოლას ბიძინა ივანიშვილის ოლიგარქიულ რეჟიმთან".
დახურვა