ნაციონალური მოძრაობა ხობის საკრებულოს წევრებმაც დატოვეს. საკრებულოს ფრაქცია 11 წევრიდან 10-მა დატოვა. შესაბამისი განცხადება მათ ბრიფინგზე გააკეთეს.
"პარტიაში განვითარებულმა არაჯანსაღმა მოვლენებმა გამოიწვია ნაციონალურ მოძრაობის ე.წ. მენეჯმენტსა და ხალხს შორის დაშორება. მოსყიდვებით და ინტრიგებით შექმნეს ხელოვნური კრიზისი, რასაც მოჰყვა ანგარებული პერსონების, ფსევდომიშისტების, ფსევდოჰუმანიზმზე დაფუძნებული კამპანია, რამაც გამოიწვია ღირსეული ადამიანების გვერდზე გაწევა. შექმნილი ვითარებიდან გამოსავლის ძიების პროცესში ხელი იქნა შეშლილი ერთობის იდეაზე, რაც კონკრეტული ადამიანების კერძო ინტერესებით იყო ნაკარნახევი. [...]
ვინაიდან პარტია ასცდა თავდაპირველ იდეას, რის გარშემოც ვიყავით გაერთიანებული გულწრფელი ადამიანების ერთობლიობა, რომელსაც წარმოვადგენდით 2003 წლის ვარდების რევოლუციაში მონაწილე და 2012 წლის შემდეგ ოპოზიციაში ყოფნისას შემოერთებული ადამიანები. დღეს კიდევ, ხობის ნაციონალური მოძრაობის საკრებულოს 11 წევრიდან, 10-მა წევრმა, ასევე, რაიონული ორგანიზაციის მებრძოლ ადამიანთა სრულმა უმრავლესობამ მივიღეთ გადაწყვეტილება, წერტილი დავუსვათ ამ ყველაფერს და დავტოვოთ ერთიანი ნაციონალური მოძრაობა", - განაცხადეს პარტიის ყოფილმა წევრებმა ბრიფინგზე.
5 დეკემბერს ზუგდიდის საკრებულოში ნაციონალური მოძრაობა 14-მა ადამიანმა დატოვა - მათ შორისაა ფრაქციის თავმჯდომარე, აპარატის სამი თანამშრომელი და საკრებულოს რამდენიმე დეპუტატი.
პარტიის დატოვების შესახებ 5 დეკემბერს ჭიათურის საკრებულოს 5-მა წევრმაც განაცხადა.
4 დეკემბერს ნაციონალური მოძრაობა ბათუმის საკრებულოს წევრებმაც დატოვეს. ეს გადაწყვეტილება საკრებულოს 13-დან 7-მა წევრმა მიიღო.
ლევან ხაბეიშვილი საკრებულოს წევრების ნაწილის მიერ პარტიის დატოვებას გამოეხმაურა და თქვა, რომ მზად არის "ნებისმიერ ფორმატში ითანამშრომლოს" მათთან. პარტიიდან წასულ წევრებს ლევან ხაბეიშვილმა წარმატება უსურვა "ოლიგარქთან ბრძოლაში და არა ნაციონალურ მოძრაობასთან ჭიდაობაში".
დახურვა