კრემლის პრესსპიკერმა დმიტრი პესკოვმა განაცხადა, რომ უკრაინის NATO-ში გაწევრიანება წარმოქმნის საფრთხეს რუსეთისთვის, რაც მოითხოვს მკაფიო და მტკიცე რეაგირებას.
კრემლში მიიჩნევენ, რომ უკრაინის NATO-ში გაწევრიანებას უარყოფითი შედეგი ექნება ევროპის უსაფრთხოებაზეც.
"უკრაინა, როგორც NATO-ს წევრი, გახდება საფრთხე რუსეთისთვის, რაც მოითხოვს მკაფიო და მტკიცე რეაგირებას", - განაცხადა პესკოვმა.
პესკოვის განცხადებით, კიევის რეჟიმი ცდილობს ზეწოლა მოახდინოს NATO-ს ქვეყნებზე, რათა ალიანსის წევრებმა გამოიჩინონ სოლიდარობა.
დღეს, 10 ივლისს უკრაინის საგარეო საქმეთა მინისტრის, დმიტრო კულებას განცხადებით, NATO-ს მოკავშირეები უკრაინისთვის MAP-ის ამოღებაზე შეთანხმდნენ.
"ინტენსიური მოლაპარაკებების შემდეგ, NATO-ს მოკავშირეებმა უკრაინის ალიანსში წევრობის გზიდან MAP-ის ამოღებაზე კონსენსუსს მიაღწიეს. მივესალმები ამ დიდი ხნის ნანატრ გადაწყვეტილებას, რომელიც ამოკლებს ჩვენს გზას NATO-სკენ. ეს ასევე საუკეთესო მომენტია იმისთვის, რომ უკრაინის გაწევრიანების შესახებ მეტი სიცხადე იყოს", - წერს Twitter-ზე უკრაინის საგარეო საქმეთა მინისტრი.
გადაწყვეტილება ოფიციალურად სავარაუდოდ, NATO-ს ვილნიუსის სამიტზე გამოცხადდება, რომელიც 11-12 ივლისს გაიმართება.
დახურვა