პროკურატურამ პოლიციელის განზრახ მკვლელობის ფაქტზე თურქეთის მოქალაქეს ბრალდება წარუდგინა

პროკურატურამ, განზრახ მკვლელობის ფაქტზე, თურქეთის მოქალაქეს ბრალდება წარუდგინა. ინფორმაციას მთავარი პროკურატურა ავრცელებს.

როგორც უწყების მიერ გავრცელებულ ინფორმაციაშია ნათქვამი, ბრალდება განზრახ მკვლელობის ფაქტზე, საქართველოს სისხლის სამართლის კოდექსის 109-ე მუხლის მე-2 ნაწილის ,,ბ’’ ქვეპუნქტით წარუდგინა, რაც გულისხმობს მკვლელობას დამნაშავისათვის წინასწარი შეცნობით უმწეო მდგომარეობაში მყოფის მიმართ.

„2020 წლის 1 ივლისს, ღამის საათებში, ბრალდებულმა ჰ.დ.-მ ქ.გორში, პოლიციის თანამშრომლის დ.ს-ს საცხოვრებელ სახლში, სადაც იგი მდგმურად იმყოფებოდა, სოცოცხლის მოსპობის მიზნით, დანის გამოყენებით, კისრის არეში ჭრილობა მიაყენა მძინარე დ.ს-ს, რომელიც შემთხვევის ადგილზე გარდაიცვალა. სამართალდამცველებმა ბრალდებული იმავე დღეს დააკავეს“, - ნათქვამია განცხადებაში.

ბრალდება 13-დან 17 წლამდე  თავისუფლების აღკვეთას ითვალისწინებს. 
სისხლის სამართლის საქმეზე გამოძიება გრძელდება.

1 ივლისს გორში პოლიციის თანამშრომელს, რომელსაც საკუთარ სახლში ეძინა, ყელის არეში სასიკვდილო ჭრილობები მიაყენეს. ბრალდებული გარდაცვლილის მდგმურია, რომელიც შემთხვევის ადგილიდან მიიმალა, თუმცა გამთენიისას სამართალდამცველებმა დააკავეს.