საქართველოში კორონავირუსის იმპორტირებული შემთხვევების თითქმის ნახევარი რუსეთზე მოდის - ამის შესახებ დაავადებათა კონტროლის ეროვნული ცენტრის ანგარიშშია აღნიშნული.
ანგარიში გუშინ გამოქვეყნდა და მასში 11 ივლისის მდგომარეობით არსებული მონაცემებია ასახული.
უფრო კონკრეტულად, 11 ივლისის მონაცემებით, საქართველოში აღრიცხული 980 შემთხვევიდან 272 (27.7%) იმპორტირებული იყო. აქედან 46,6% (127) რუსეთზე მოდის, 8.4% (23) თურქეთზე, 8% (22) და 7.7% (21), შესაბამისად, აზერბაიჯანსა და სომხეთზე.
შეგახსენებთ, საქართველოს მოქალაქეებს რუსეთიდან დაბრუნება სახმელეთო საზღვრით შეუძლიათ. ქვეყანაში შემოსვლის შემდეგ, მათ 14-დღიანი სავალდებულო კარანტინი უნდა გაიარონ.
ბოლო მონაცემებით, ქვეყანაში კოვიდ 19-ის 1 155 შემთხვევაა აღრიცხული. აქედან 929 პაციენტი ვირუსისგან განიკურნა, 16 კი - გარდაიცვალა.