ქუთაისის ინფექციურ საავადმყოფოს ორ პაციენტს კოვიდ-19-ი დაუდასტურდა.
ორივეს ჯანმრთელობის მდგომარეობა საშუალო სიმძიმისაა. ერთ-ერთი მათგანი კორონავირუსით ინფიცირებული ვანში მცხოვრები ქალის მეუღლეა, მეორე კი სიძე.
მედიკოსები ამბობენ, რომ ვანის კლასტერის კონტაქტების დადგენა გრძელდება. ამ დროისთვის ქუთაისში ვირუსის სიმპტომებით სამი ახალი პაციენტია მოთავსებული. მათი ანალიზების პასუხები საღამოს გახდება ცნობილი. ისინი ვანის კლასტერს არ მიეკუთვნებიან.
შეგახსენებთ, რომ საქართველოში კორონავირუსით ინფიცირებულთა რაოდენობა 214-მდე გაიზარდა. კარანტინის რეჟიმში იმყოფება 4722 პირი, სტაციონალური მეთვალყურეობის ქვეშაა 408 ადამიანი. 50 პაციენტი ვირუსისგან სრულად განიკურნა, 3 კი, გარდაიცვალა.
საქართველოში ვირუსით ინფიცირების პირველი შემთხვევა 26 თებერვალს დაფიქსირდა. ქვეყანაში უკვე დაფიქსირებულია შიდა გადაცემის ფაქტებიც.
ჯანმომ ვირუსი პანდემიად 11 მარტს გამოაცხადა.
დახურვა