ქუთაისის ინფექციურ საავადმყოფოში ამ დროისთვის ვირუსის სიმპტომებით 8 პაციენტია მოთავსებული.
საავადმყოფოს მთავარი ექიმის, თემურ ნადირაძის განცხადებით, მათგან 3-ის ანალიზების პასუხს დღეს ელოდებიან, ხუთს კი ანალიზს დღეს აუღებენ.
ნადირაძის ინფორმაციით, ყველას საზღვარგარეთ მოგზაურობის ისტორია აქვს და ისინი საავადმყოფოში საკარანტინო ზონებიდან გადმოიყვანეს. ვირუსის სიმპტომების მიუხედავად, მათი მდგომარეობა დამაკმაყოფილებელია.
"სტაციონარში გვიწევს 8 პაციენტი კოვიდ-19-ზე გამოსაკვლევი. დღის ბოლომდე რვავე პაციენტის პასუხები გვეცოდინება. ძირითად ყველანი არიან საკარანტინო ზონიდან გადმოყვანილები. კერძოდ კი საირმედან და წყალტუბოდან. მათ ჰქონდათ ან მოგზაურობის ისტორია ან ჩამოსულ სტუმართან, ოჯახის წევრთან უშუალო კონტაქტი", - ამბობს ნადირაძე.
პანდემიის გამოცხადებიდან ამ დრომდე, ქუთაისის კლინიკაში 150-მდე ანალიზი აიღეს და ყველა უარყოფითია.