გია ჯაფარიძე: ამერიკა და მსოფლიო აღარ იქნება ისეთი, როგორიც იყო

პოლიტოლოგი გია ჯაფარიძე აშშ-ში განვითარებულ მოვლენებს ეხმაურება და იმედოვნებს, რომ ამერიკაში რადიკალიზმის გამომწვევ მიზეზებს დაამარცხებენ. 

ჯაფარიძის თქმით, აშშ აღარ იქნება ისეთი, როგორიც აქამდე იყო.

"ამერიკის შეერთებული შტატები აღარ იქნება ისეთი, როგორიც იყო. ალბათ, არც მსოფლიო იქნება ისეთი, როგორიც იყო. იმედი მაქვს, ამერიკის შეერთებული შტატები იპოვის ძალებს, რომ ერთის მხრივ, აშშ-სთვის ძალიან არაბუნებრივი რადიკალიზმი დაამარცხოს და მეორეს მხრივ, დაამარცხოს ის მიზეზები, რომელიც ამ რადიკალიზმს იწვევს", - აცხადებს ჯაფარიძე.

ძალაუფლების მშვიდობიანი გადაბარების საკითხი კონგრესში მიმდინარე დისკუსიაზე მას შემდეგ გახდა რელევანტური, რაც არჩევნების შედეგების არაღიარების გამო მოქმედი პრეზიდენტის, დონალდ ტრამპის მხარდამჭერები კაპიტოლიუმის შენობაში შეიჭრნენ და იმ სხდომის ჩაშლა სცადეს, რომელზეც საპრეზიდენტო არჩევნების შედეგები უნდა დამოწმებულიყო. 

დემონსტრანტების კონგრესის შენობაში შეჭრის შედეგად გარდაიცვალა ოთხი ადამიანი, ხოლო დაშავდა რამდენიმე სამართალდამცავი, არმიამ კი სიტუაციის დეესკალაციის მიზნით კაპიტოლიუმში ვაშინგტონის ნაციონალური გვარდია გაგზავნა. 

შენობაში შეჭრის შემდეგ კაპიტოლიუმში ლოკდაუნი გამოცხადდა, სენატორები და კონგრესმენები უსაფრთხოების მიზნით თავიანთ კაბინეტებში იმყოფებოდნენ, ვაშინგტონის მერმა კი ქალაქში კომენდანტის საათი გამოაცხადა. 

მოგვიანებით ცნობილი გახდა, რომ სამართალდამცველებმა შენობაში ხელნაკეთი ბომბი გაანეიტრალეს, რომელიც აფეთქების რეალურ რისკებს შეიცავდა. 

აშშ-ის კონგრესმა ტრამპის მხარდამჭერების მიერ მოწყობილი არეულობიდან რამდენიმე საათში მუშაობა განაახლა. სხდომა ვიცე-პრეზიდენტმა მაიკ პენსმა გახსნა. პენსის თქმით, თავისუფლება ყოველთვის იმარჯვებს ძალადობაზე. სხდომის განახლებიდან რამდენიმე საათში აშშ-ის კონგრესმა ამერიკის არჩეულ პრეზიდენტად ჯო ბაიდენი, ვიცე-პრეზიდენტად კი კამალა ჰარისი ცნო.

შტურმამდე სენატორებსა და კონგრესმენებს შორის მწვავე დებატები მიმდინარეობდა. რამდენიმე რესპუბლიკელი კანონმდებლის საპირისპირო პოზიციის მიუხედავად, ტრამპის მომხრე რესპუბლიკელები ამტკიცებდნენ, რომ არჩევნები გაყალბდა და რომ დემოკრატ საპრეზიდენტო კანდიდატს და აშშ-ის არჩეულ პრეზიდენტს ჯო ბაიდენს ლეგიტიმურად არ გაუმარჯვია. 

საპრეზიდენტო არჩევნების დასრულებიდან მოყოლებული თავად პრეზიდენტი ტრამპი უკვე მე-10 კვირაა ამტკიცებს, რომ არჩევნები გაყალბდა. მიუხედავად იმისა, რომ ამერიკის ყველა სასამართლო ინსტანციამ, მათ შორის, ამერიკის უზენაესმა სასამართლომ, რომელიც ტრამპის პრეზიდენტობის პერიოდში უმეტესად კონსერვატორი მოსამართლეებით დაკომპლექტდა, ტრამპის კამპანიის არცერთი სარჩელი არ დააკმაყოფილა. 

თავად ტრამპმა Twitter-ზე ვიდეო გამოაქვეყნა, რომლითაც მომიტინგეებს სახლში წასვლისკენ მოუწოდა, თუმცა კიდევ ერთხელ განაცხადა, რომ მას და მის მხარდამჭერებს არჩევნები მოპარეს.  შემდეგ Twitter-ის პოსტში კი ტრამპმა განაცხადა, რომ კაპიტოლიუმის შენობაში მომიტინგეთა შეჭრა სწორედ პატრიოტი ამერიკელებისთვის არჩევნების გაყალბების შედეგია. 

მოგვიანებით, Twitter-მა 12 საათით და Facebook-მა 24 საათით ტრამპის ანგარიშები დაბლოკეს. Twitter-ში აცხადებენ, რომ თუ ტრამპი კვლავ დაარღვევს წესებს, შესაძლოა, მისი ანგარიში სამუდამოდ დაიბლოკოს. Facebook-ში კი აცხადებენ, რომ მათ წაშალეს ტრამპის ვიდეო, რომელიც ზრდიდა ძალადობის რისკებს. აღსანიშნავია, რომ ტრამპი ვიდეო YouTube- მაც წაშალა.

5 იანვარს გამოქვეყნდა სკანდალური ჩანაწერი აშშ-ის მოქმედ პრეზიდენტსა და ჯორჯიას შტატის რესპუბლიკელ სახელმწიფო მდივან ბრედ რაფენსპერგერს შორის, რომელიც შტატის საარჩევნო ადმინისტრაციის უმაღლესი წარმომადგენელია, რომელშიც ტრამპი რესპუბლიკელი მაღალჩინოსნის იძულებას ცდილობდა, რათა შტატის ადმინისტრაციას ხმები ხელახლა გადაეთვალა. 

ტრამპი რაფენსპერგერისგან მოითხოვდა, გადათვლისას იმ რაოდენობის ხმები ეპოვნათ, რამდენიც რესპუბლიკელ კანდიდატს შტატში გასამარჯვებლად სჭირდებოდა. სამართლის ექსპერტების მოსაზრებით, სატელეფონო ჩანაწერი სისხლის სამართლის დანაშაულის ნიშნებსაც კი შეიცავდა. 

მიუხედავად იმისა, რომ ტრამპი და რესპუბლიკელების ნაწილი სამი თვეა აშშ-ის არჩევნების შედეგებს არ აღიარებენ, დემოკრატი კანდიდატის ჯო ბაიდენის ინაუგურაცია 20 იანვარს შედგება, თეთრი სახლის ადმინისტრაციას კი ტრანზიციის პროცესი უკვე დაწყებული აქვს.