უკრაინამ და გერმანიამ თავდაცვის სფეროში თანამშრომლობის ახალი, მასშტაბური პაკეტი შეათანხმეს, რომლის საერთო ღირებულება 4 მილიარდ ევროს შეადგენს. შეთანხმება გერმანიის თავდაცვის მინისტრთან, ბორის პისტორიუსთან მოლაპარაკებების შედეგად შედგა. პაკეტი მიზნად ისახავს საჰაერო თავდაცვის გაძლიერებას, შორი მოქმედების შესაძლებლობების განვითარებასა და დრონების ერთობლივ წარმოებას.
ვიზიტის ფარგლებში გერმანიასთან სამი მნიშვნელოვანი შეთანხმება გაფორმდა:
1. საჰაერო თავდაცვის გაძლიერება
გერმანია დააფინანსებს კონტრაქტს Patriot-ის სისტემებისთვის ასობით რაკეტის მიწოდებაზე. ეს გადაწყვეტილება მნიშვნელოვნად გააძლიერებს უკრაინის ქალაქებისა და კრიტიკული ინფრასტრუქტურის დაცვას. გარდა ამისა, პაკეტი ითვალისწინებს 36 ერთეული IRIS-T გამშვები დანადგარის გადაცემას, რაც უკრაინის ცის მრავალდონიან დაცვას უზრუნველყოფს.
2. "ღრმა დარტყმის" შესაძლებლობების განვითარება
მხარეები შორი მოქმედების შესაძლებლობების გასავითარებლად 300 მილიონი ევროს ინვესტიციაზე შეთანხმდნენ. აღნიშნული თანხა უკრაინული წარმოების იმ შეიარაღების გაზრდას მოხმარდება, რომელსაც მოწინააღმდეგის სიღრმეში დარტყმის განხორციელება შეუძლია.
3. დრონების წარმოება
ინიციატივის - Build with Ukraine - ფარგლებში, იწყება ხელოვნური ინტელექტის მქონე mid-strike დრონების ერთობლივი წარმოება. პირველ ეტაპზე თავდაცვის ძალებისთვის 5 000 ერთეული დრონის დამზადებაა დაგეგმილი.
ბორის პისტორიუსმა დაადასტურა გერმანიის სისტემური მხარდაჭერა და აღნიშნა, რომ ეს არის ორმხრივად მომგებიანი თანამშრომლობა, რომელიც აძლიერებს როგორც უკრაინის თავდაცვისუნარიანობას, ისე მთელი ევროპის უსაფრთხოებას.
დახურვა