ჩეჩნეთის მეთაურმა რამზან კადიროვმა სულელური უწოდა განცხადებებს, მისი ბრძანებით ქართველ ჟურნალისტზე თავდასხმის მცდელობის შესახებ.
„ოდესღაც წარმატებით განვითარებად ქვეყნები იმართება ადამიენების მიერ, რომლებიც ხალხის რეალურ პრობლემებზე ფიქრის ნაცვლად, სულელურ განცხადებებს აკეთებენ. ამჯერად ამბობენ, რომ მათ მკვლელი დაიჭირეს, რომელიც კადიროვის ბრძანებით ქართველ ვაი- ჟურნალისტზე მკვლელობას გეგმავდა.
ბატონებო, დამიჯერეთ, თუ ვინმე მოქმედებს ჩემი დავალებით, ის შეასრულებს ამ დავალებას. თუ დავალება ჩუმად უნდა შესრულდეს, მაშინ ვერავინ, და მით უმეტეს, ღრმა სტაგნაციაში მყოფი თქვენი ქვეყნები ამის შესახებ ვერ გაიგებენ“, - წერს კადიროვი თავის Telegram- ის გვერდზე.
კადიროვმა საქართველოს ხელისუფლებას მოუწოდა გაბუნიას ხელახლა აღსაზრდელად ზომები მიიღოს.
„მე ხაზგასმით აღვნიშნავ, რომ ჩვენ არ დაგვივიწყებია იმის შესახებ, თუ როგორ შეურაცხყო მან ჩვენი სახელმწიფო, ჩვენი ხალხი და, შესაბამისად, პირადად მე. გიორგი გაბუნიამ, როგორც ადრეც ვთქვი, უმჯობესია დაიჩოქოს და პატიება ითხოვოს, მოიხადოს ბოდიში მომხდარის გამო. მან შეურაცხყო არა ერთი ადამიანი, არამედ რუსეთის ყველა მოქალაქე. მივმართავ საქართველოს ხელისუფლებას, მიიღონ ზომები, რომლებიც ხელს შეუწყობს ამ მოქალაქის ხელახალ აღზრდას ”- წერს კადიროვი.
მან ჟურნალისტს მოუწოდა, გამოიტანოს სწორი დასკვნები და გონება წესრიგში მოიყვანოს და დასძინა, რომ წინააღმდეგ შემთხვევაში იგი მის მტრად დარჩება.
შეგახსენებთ, გუშინ „ფორმულამ“ გაავრცელა ინფორმაცია, რომ ქავთარაძის ქუჩაზე ჩატარებული სპეცოპერაციისას დაკავებული პირი რუსეთის მოქალაქეა და ის საქართველოში სავარაუდოდ, ჟურნალისტ გიორგი გაბუნიას ლიკვიდაციისთვის იყო ჩამოსული.
სახელმწიფო უსაფრთხოების სამსახურმა "ფორმულას" ინფორმაცია დაადასტურა. უწყების მიერ გავრცელებულ განცხადებაში აღნიშნულია, რომ რუსეთის მოქალაქე ვ.ბ. შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში დააკავეს.
ამავე თემაზე: პრემიერმა გიორგი გახარიამ პირველი არხის ეთერში გადაცემაში „თავისუფალი ხედვა“ სუს-ის მიერ რუსეთის მოქალაქის დაკავებაზე გააკეთა განცხადება და აღნიშნა, რომ სამართალდამცველი სისტემის უპირველესი მოვალეობაა, რომ განსაკუთრებით ცნობილი ჟურნალისტის წინააღმდეგ ჩადენილი მსგავსი დანაშაული იყოს მაქსიმალურად სწრაფად გამოძიებული. გახარიას თავის კომენტარში კადიროვი და რუსეთი არ უხსენებია.
დახურვა