აბესაძე საარჩევნო კანონზე: შენიშვნები არასაკმარისად გაითვალისწინეს

„მთავარი გამოწვევა ამ არჩევნების და საარჩევნო კოდექსის უნდა ყოფილიყო მაქსიმალური გამორიცხვა ამომრჩევლის ნებაზე ზეწოლის, ამომრჩევლის დაშინებისა და მასზე ძალადობის. ორივე საელჩოს განცხადება ადასტურებს, რომ ამ მიმართულებით შენიშვნები არასაკმარისად იქნა გათვალისწინებული. თუ ჩვენ შევაფასებთ, საერთოდ არ იქნა მოცემული ისეთი ნორმები, რომელიც გამორიცხავს იმ მავნე პრაქტიკას, რომელსაც "ქართული ოცნების" მიერ ჩატარებულ არჩევნებში მუდმივად ვაკვირდებოდით“, - განაცხადა აბესაძემ.

საარჩევნო კოდექსში ცვლილებებს მხარი  94-მა დეპუტატმა დაუჭირა, ხოლო 1 დეპუტატი - ალექსანდრე ერქვანია, წინააღმდეგ წავიდა.

კენჭისყრაში მონაწილეობა არ მიუღიათ „ევროპულ საქართველოსა“ და „ნაციონალურ მოძრაობას“. მათ აღნიშნეს, რომ საარჩევნო ცვლილებები ეუთო/ოდირის რეკომენდაციებს არ ეყრდნობა.

ცვლილებათა პაკეტის მიღებას ამერიკის საელჩო გამოეხმაურა. განცხადებაში ნათქვამია, რომ კანონში ზოგიერთი მნიშვნელოვანი ხარვეზი ისევ რჩება. ცვლილებების მიღებას ევროკავშირის ელჩი საქართველოში კარლ ჰარცელიც გამოეხმაურა და აღნიშნა, რომ სასურველი იქნებოდა უფრო ამბიციური რეფორმების გატარება.

2020 წლის 29 ივნისს პარლამენტმა საარჩევნო სისტემის ცვლილებების კანონპროექტს მხარი დაუჭირა - შემოდგომაზე საპარლამენტო არჩევნები პროპორციულთან მეტად დაახლოებული სისტემით, 120/30 პროპორციით ჩატარდება - 120 დეპუტატს ქვეყნის მოსახლეობა პროპორციული წესით აირჩევს 1%-იანი ბარიერით, 30-ს კი მაჟორიტარული წესით. მიღებულმა ცვლილებებმა რამდენიმე კანონში შესატანი შესწორებების საჭიროება წარმოშვა, კერძოდ იცვლება საარჩევნო კოდექსი, "მოქალაქეთა პოლიტიკური გაერთიანებების შესახებ" კანონი, ცვლილებები შედის ადმინისტრაციულ სამართალდარღვევათა და სისხლის სამართლის კოდექსებში, "მაუწყებლობის შესახებ" საქართველოს კანონში.

კონკრეტულად რა ცვლილებებზეა საუბარი, წაიკითხეთ აქ.