აშშ-ის პრეზიდენტის ჯო ბაიდენის ცნობით, აშშ-ის დიპლომატიური პერსონალის სუდანიდან ევაკუაცია დასრულდა.
"დღეს ჩემი განკარგულებით, აშშ-ის ჯარმა ჩაატარა აშშ-ის სახელმწიფო პერსონალის ხარტუმიდან გამოყვანის ოპერაცია" - განაცხადა ბაიდენმა.
ცალკე განცხადებაში კი აშშ-ის სახელმწიფო მდივანმა ენტონი ბლინკენმა თქვა, რომ სუდანიდან აშშ-ის პერსონალისა და მათი ოჯახების ევაკუაცია მოხდა და ხარტუმში აშშ-ის საელჩოს მოქმედება „დროებით შეჩერდა“.
აშშ-ის თავდაცვის მდივნის, ლოიდ ოსტინის თქმით, ამერიკელების სუდანიდან გამოყვანაში 100-ზე მეტი სპეციალური ოპერაციული ძალების თანამშრომელი იყო ჩართული. ოპერაციას აშშ-ის აფრიკის სარდლობა სახელმწიფო დეპარტამენტთან კოორდინაციაში უძღვებოდა.
ამერიკელი პერსონალის სუდანიდან ევაკუაციის გადაწყვეტილება ხელისუფლებამ სუდანის ჯარსა და სწრაფი რეაგირების ძალებს შორის დაპირისპირების დაწყებიდან 1 კვირაში მიიღო.
ჯანდაცვის მსოფლიო ორგანიზაციის 21 აპრილის მონაცემებით, სუდანში შეტაკებების შედეგად 413 ადამიანი დაიღუპა 3 551 კი დაშავდა.
სუდანიდან მოქალაქეების ევაკუაციის შესახებ დღეს, 23 აპრილს გამოაცხადა ნიდერლანდების ხელისუფლებამაც. ქვეყნიდან მოქალაქეების გაყვანა დაიწყო საფრანგეთმა და საუდის არაბეთმაც.
სუდანიდან საქართველოს 35-მდე მოქალაქის ევაკუაცია უკვე რამდენიმე დღეა ვერ ხერხდება.
სუდანის დედაქალაქ ხარტუმში სუდანის არმიასა და გასამხედროებულ სწრაფი რეაგირების ძალებს შორის სამოქალაქო მმართველობაზე გადასვლის შესახებ უთანხმოების გამო შეიარაღებული დაპირისპირება 15 აპრილს დაიწყო.
დახურვა