17 წლის ჩათვლით ბავშვებისთვის 200-ლარიანი დახმარების მისაღებად, მშობლებს რეგისტრაციის გავლა ჯანდაცვის სამინისტროს ვებ-გვერდზე www.moh.gov.ge და ელექტრონულ პორტალზე - daxmareba.moh.gov.ge შეეძლებათ.
უწყების მიერ გავრცელებული ინფორმაციის მიხედვით, ელექტრონულ პორტალზე უნდა განთავსდეს შემდეგი სახის ინფორმაცია:
- ბავშვის სახელი, გვარი, დაბადების თარიღი, პირადი ნომერი;
- მშობლის/კანონიერი წარმომადგენლის სახელი, გვარი, პირადი ნომერი;
- მშობლის/კანონიერი წარმომადგენლის სახელზე კომერციულ საბანკო დაწესებულებაში გახსნილი საბანკო ანგარიშის რეკვიზიტები (ბანკის ანგარიშის ნომერი);
- საკონტაქტო მობილური, რომელზეც მოკლე ტექსტური შეტყობინებების გაგზავნა მოხდება.
იმ შემთხვევაში, თუ იუსტიციის სამინისტროს სერვისების განვითარების სააგენტოს მიერ, ვერ ხდება ბავშვსა და მშობელს შორის ურთიერთკავშირის დადასტურება, მშობელმა ელექტრონულ პორტალზე ბავშვის დაბადების მოწმობა უნდა ატვირთოს.
თუ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მიერ ვერ ხდება ბავშვსა და კანონიერ წარმომადგენელს შორის ურთიერთკავშირის დადასტურება, კანონიერმა წარმომადგენელმა ელექტრონულ პორტალზე მეურვედ/მზრუნველად დანიშვნის გადაწყვეტილება უნდა ატვირთოს.
ელექტრონულ პორტალზე შევსებული განაცხადით, მშობელი/კანონიერი წარმომადგენელი ადასტურებს შევსებული მონაცემების სისწორეს.
სოციალური დახმარება, ბავშვის ერთ-ერთი მშობლის ან კანონიერი წარმომადგენლის მიერ, ბავშვის ელექტრონულ პორტალზე განცხადების შევსების შემდეგ გაიცემა. 0-დან 17 წლის ჩათვლით ბავშვებისთვის 200-ლარიანი დახმარების მისაღებად, მშობლებს რეგისტრაციის გავლა 15 აგვისტოდან პირველ დეკემბრამდე შეეძლებათ. დახმარების მიღება შესაძლებელი იქნება მიმდინარე წლის სექტემბრიდან.
თუ ფიზიკურ პირი ელექტრონულ პორტალზე რეგისტრაციის გავლას ვერ ახერხებს, უნდა მიმართოს:
- სსიპ სოციალური მომსახურების სააგენტოს ყველა ტერიტორიულ ერთეულს
- საქართველოს რეგიონული განვითარებისა და ინფრასტრუქტურის სამინისტრო და ადგილობრივი თვითმმართველობებს
- საქართველოს იუსტიციის სამინისტროს იუსტიციის სახლებს და საზოგადოებრივ ცენტრებს
- „ლიბერთი ბანკის“ ფილიალებს
ელექტრონულ პორტალზე შესაბამისი დოკუმენტაციის ატვირთვა 24 საათის განმავლობაშია შესაძლებელი.
დამატებითი ინფორმაციის მიღება მშობლებს ჯანდაცვის სამინისტროს ცხელ ხაზზე 1505-ზე შეეძლებათ.
პრემიერმინისტრის, გიორგი გახარიას განცხადებით, 17 წლის ჩათვლით საქართველოს მოქალაქეები სახელმწიფოს მხრიდან დახმარების სახით ერთჯერადად 200 ლარს მიიღებენ. მისივე განცხადებით, დახმარება სასწავლო წლის დაწყებამდე და დაწყების პროცესში განხორციელდება.
დახურვა