საქართველოს პრეზიდენტმა, სალომე ზურაბიშვილმა შეხვედრაზე, სადაც სხვადასხვა სფეროს წარმომადგენელ ქალებს მასპინძლობს, 9 აპრილზე ისაუბრა. 1989 წლის 9 აპრილის ტრაგედიის გარდა, მან ყურადღება გაამახვილა 1991 წელზეც და თქვა, რომ 9 აპრილი, უპირველეს ყოვლისა, გამარჯვების სიმბოლოა.
"9 აპრილი რა არის ჩვენთვის? ეს არის, პირველ რიგში, სიმბოლო სწორედ გამარჯვებისა უფრო მეტად, ვიდრე ტრაგედიისა და ამიტომ, უნდა ვიზეიმოთ 9 აპრილი და არა ვიგლოვოთ, იმის მიუხედავად, რომ მართლაც ტრაგედია იყო და ქალების წვლილი ამ ტრაგედიაში, სამწუხაროდ დიდი, მაგრამ ეს იმიტომ, რომ მაშინ რუსის ჩექმამ და რუსის სისასტიკემ, პირველ რიგში, მიზნად აიღო ქალები. ეს გამარჯვება არის ყველასი, იმიტომ, რომ 9 აპრილი არის სიმბოლო ერთიანობის, ერთობის, იქ რომ არ ყოფილიყო ერთად მდგარი საქართველო, არაფერი არ მოჰყვებოდა იმ 9 აპრილს.
ერთად მდგარი რომ იყო, ეს მიხვდა ზვიად გამსახურდიამ და ამიტომ იყო რეფერენდუმი 31 მარტს, რომელიც ასევე ჩვენი ერთობის ერთ-ერთი ყველაზე მნიშვნელოვანი თარიღია და ამას მოჰყვა მეორე 9 აპრილი და დამოუკიდებლობის აქტი და ამას მოჰყვა 26 მაისი და აღდგენა ჩვენი სახელმწიფო დამოუკიდებლობის, აღდგენა იმით, რომ სამართალმემკვიდრედ იქნა ცნობილი პირველი რესპუბლიკისა და ამით გავაუქმეთ 70 წელი მონობისა, გავაუქმეთ, მაგრამ არ დავავიწყეთ.
არ დავივიწყეთ, იმიტომ, რომ 9 აპრილი ასევე არის ყველა ჩვენი ბრძოლის და ომის გაერთიანება, სადაც ქართველები თავიანთი იდენტობისთვის, ენისთვის, რწმენისთვის და მომავლისთვის იბრძოდნენ. ჩვენ როცა ვიხსენებთ 9 აპრილს, ერთად გავიხსენოთ ყველა", - განაცხადა ზურაბიშვილმა.
დღეს 9 აპრილის ტრაგედიიდან 34 წელი გავიდა. 1989 წლის 9 აპრილს საბჭოთა კავშირის სადამსჯელო ნაწილები სასტიკად გაუსწორდნენ თბილისში, პარლამენტის წინ შეკრებილ მშვიდობიან მოქალაქეებს. სადამსჯელო ოპერაციას 21 ადამიანის სიცოცხლე შეეწირა, რომელთა უმეტესობა ახალგაზრდები იყვნენ, მათ შორის სამი 16 წლის მოზარდი.
დახურვა