logo
ENG



ღარიბაშვილი: საქართველოს სასამართლო სისტემა ბევრად წინ უსწრებს EU-ს წევრების სასამართლოს

01 სექ 202111:15
3 წუთის საკითხავი
 

პრემიერი ირაკლი ღარიბაშვილი პასუხობს ევროპარლამენტარების კრიტიკას სასამართლო რეფორმაზე და აცხადებს, რომ საქართველოს სასამართლო სისტემა "ბევრად წინ უსწრებს" ევროკავშირის ქვეყნებისას. საქმე ეხება ევროკავშირის განცხადებას, რომ საქართველომ ფინანსური დახმარების პირობა ვერ შეასრულა სასამართლო რეფორმის არასრულყოფილად განხორციელების გამო. 

"ჩვენ კარგად ვიცით, როგორი სასამართლო ჩაიბარა ქართულმა ოცნებამ. მას შემდეგ, არაერთი რეფორმა განვახორციელეთ, 4 ტალღა რამაც რეალურად გამჭვირვალე და ანგარშვალდებული გახადა ეს სისტემა.

საქართველოს სასამართლო სისტემა ბევრად წინ უსწრებს ევროკავშირის მოქმედი წევრების სასამართლო სისტემას, ყველა კვლევით დასტურდება ეს. 

ჩვენ რეფორმებს ვაგრძელებთ, სასამართლო რეფორმაც გაგრძელდება", - თქვა ღარიბაშვილმა. 

ევროკავშირის წარმომადგენლობის განცხადებით, საქართველომ ვერ შეძლო მაკროფინანსური დახმარების პირობა სრულად შეესრულებინა. კერძოდ, საუბარია სასამართლო სისტემის დამოუკიდებლობისა და ანგარიშვალდებულების გაზრდაზე. 

განცხადებაში ნათქვამია, რომ ფინანსური დახმარება კორონავირუსთან ბრძოლასა და საქართველოს მოსახლეობას უნდა მოხმარებოდა. ამასთან, ევროკავშირი ხელისუფლებას რეფორმებთან დაკავშირებული ვალდებულებების შესრულებისკენ მოუწოდებს და მიუთითებს მართლმსაჯულების რეფორმისკენ.

ირაკლი ღარიბაშვილმა 31 აგვისტოს თქვა, რომ ხელისუფლება "თავს შეიკავებს" ევროკავშირის 75 მილიონიანი დახმარების მიღებაზე.

ეს ევროკავშირის გაფრთხილებაზე ფინანსური დახმარების შესახებ ქართული ოცნების მიერ მოფიქრებული ახალი მესიჯბოქსია.

ღარიბაშვილის თქმით, EU ამ თანხას საქართველოს სესხის სახით აძლევდა, მთავრობამ კი "საგარეო ვალის შემცირება დაიწყო და თანხის მიღების აუცილებლობა აღარ იქნება". 

გუშინ, 30 აგვისტოს ამ თემაზე ქართული ოცნების თავმჯდომარემ ირაკლი კობახიძემაც ისაუბრა. მან თქვა, რომ ევროკავშირის მიერ დახმარების სახით 75 მილიონი ევროს მიღებას ფინანსური დატვირთვა აღარ აქვს, ვინაიდან საქართველოს ბიუჯეტში, "მაღალი ეკონომიკური ზრდიდან გამომდინარე, ისედაც გროვდება დამატებით 1 მილიარდი ლარი". 

 


close დახურვა