logo
ENG



ხვიჩია ნავალნიზე: ნებისმიერ შემთხვევაში, ეს არის მკვლელობა

16 თებ 202417:20
3 წუთის საკითხავი
 
2024/02/16/egljp8aoomch4iu.jpg

გირჩის ლიდერის იაგო ხვიჩია ალექსეი ნავალნის ციხეში დაღუპვასთან დაკავშირებით აცხადებს, რომ ეს ნებისმიერ შემთხვევაში, მკვლელობას ნიშნავს. 

"მიუხედავად იმისა, ადამიანი საკუთარი სიკვდილით გარდაიცვალა, თუ ხელოვნურად ახლა მოკლეს, ნებისმიერ შემთხვევაში, ეს არის მკვლელობა მისი ისტორიის გათვალისწინებით - მისი მოწამვლის, მისი უკან დაბრუნების და ყველაფრის გათვალისწინებით. 

თუ რამით შეუძლიათ იამაყონ ნორმალურმა ადამიანებმა რუსეთში, ეს არის ის, რომ ნავალნის მსგავსი ადამიანი ჰყავდათ", - ამბობს ხვიჩია. 

***

რუსეთის სასჯელაღსრულების რეგიონული სამმართველო იუწყება, რომ რუსი ოპოზიციონერი პოლიტიკოსი ალექსეი ნავალნი გამოსასწორებელ კოლონიაში დაიღუპა

ნავალნი 47 წლის იყო.

უწყებაში ამტკიცებენ, რომ ყველა საჭირო რეანიმაციული ღონისძიება ჩატარდა, თუმცა მისი გადარჩენა ვერ შეძლეს: "გარდაცვალების მიზეზი დგინდება".

კრემლის პროპაგანდისტული RT ირწმუნება, რომ ნავალნის გარდაცვალების მიზეზი შესაძლოა თრომბია.

დეკემბერში ალექსეი ნავალნი განსაკუთრებული რეჟიმის კოლონიაში გადაიყვანეს, რომ პოლარული წრის მიღმა მდებარეობს.

ალექსეი ნავალნი 2021 წელს დააკავეს, როდესაც გერმანიიდან რუსეთში დაბრუნდა, სადაც მოწამვლის შემდეგ მკურნალობას გადიოდა. მაშინ ივ როშეს საქმეზე პოლიტიკოსს პირობითი მსჯავრი რეალურით შეუცვალეს.

2022 წელს სასამართლომ ნავალნის 9 წლით თავისუფლების აღკვეთა მიუსაჯა და ის თაღლითობაში დაადანაშაულა. 2023 წლის აგვისტოს ე.წ. ექსტრემიზმის საქმეზე ნავალნის 19 წელი მიუსაჯეს. თავდაპირველად ნავალნი ვლადიმირის ოლქის ციხეში იმყოფებოდა. გასული წლის დეკემბერში კი მისი ეტაპირება მკაცრი რეჟიმის კოლონიაში მოხდა.

ეატპირების პერიოდში ალექსეი ნავალნის თანამოაზრეები და ადვოკატები 20 დღის განმავლობაში ვერ უკავშირდებოდნენ, 25 დეკემბერს კი ცნობილი გახდა, რომ ახალ ციხეში გადაიყვანეს.

3 კოლონიაში, რომელსაც "პოლარულ მგელსაც" უწოდებენ და სადაც ახლა ნავალნი იყო მოთავსებული, იმყოფებოდნენ YUKOS-ის ერთ-ერთი თანამფლობელი პლატონ ლებედევი, ასევე უკრაინელი რეჟისორი და აქტივისტი ოლეგ სენცოვი.

აღნიშნულ ციხეში პირობები საკმაოდ მკაცრია, მისვლაც საკმაოდ რთულია და წერილების მიწოდებაც გართულებულია.

 

close დახურვა