კანონპროქტს, რომელსაც პარლამენტი განიხილავს არასამთავრობო ორგანიზაციები აფასებენ. არასამთავრობოების წარმომადგენლების თქმით, კანონში ცვლილების შეტანა, რომლის მიხედვითაც მმართველ გუნდს სამომავლოდ შეზღუდვების დასაწესებლად პარლამენტის მხარდაჭერა აღარ დასჭირდება, ბევრ კითხივის ნიშანს აჩენს.
როგორც „საერთაშორისო გამჭირვალობა საქართველოს“ წევრი ლიკა საჯაია აცხადებს, კანონპროექტი არაკონსტიტუციურია.
„კანონპროექტი საბოლოოდ, ალბათ, წავა საკონსტიტუციო სასამართლოში და გასაჩივრდება იმიტომ, რომ ეს ცალსახად ეწინააღმდეგება საქართველოს კონსტიტუციას. ფაქტობრივად მოხდა ისე, რომ საგანგებო მდგომარეობასა და საკარანტინე ღონისძიებებს შორის პარლამენტმა ტოლობის ნიშანი დასვა. ის, რაც აქამდე პარლამენტის გადასაწყვეტი იყო - ადამიანის უფლებების შეზღუდვა საგანგებო ვითარებაში, ამ შემთხვევაში მთავრობა გადაწყევტს და ეს საქართველოს კონსტიტუციას ეწინააღმდეგება, ეწინააღმდეგება ხელისუფლების დანაწილების პრინციპსა და ქვეყნის დემოკრატიულ განვითრებას. პარლამენტმა ფაქტიურად მოიხსნა პასუხისმგებლობა და მთელი უფლებამოსილება მთავრობას გადააბარა“, - განაცხადა საჯაიამ.
„სამართლიანი არჩევნების“ დირექტორს მიხეილ ბენიძეს კი მიაჩნია, რომ თუ კანონპროექტი დაამტკიცცებს, დავა საკონსტიტუციო სასამართლოში გაგრძელდება.
„ამ კანონპროექტს როდესაც ვუყურებთ, იქ ჩამონათვალი თუ რა უფლებების შეზღუდვა შეუძლია მთავრობას პარლამენტის ზედამხედველობის გარეშე, საკმაოდ ფართოა და ძალიან რისკების შემცველი. პირველ რიგში, ეს შეიცავს კონსტიტუციით დაცულ უფლებებს. ამიტომ, ამ კანონპროექტის კანონად ქცევის შემთხვევაში დადგება საკონსტიტუციო დავის საკითხი. მთავრობას მათ შორის შეუძლია, რომ თუ საჭირო იქნება, კონკრეტულ რეგიონებში იყოს საგანგებო მდგომარეობა. მაგალითად, როდესაც ვხედავთ, რომ ბოლნისში არის ცოტა უფრო მეტი პრობლემა. ამის უფლებას იძლევა დღევანდელი მოწყობა კანონმდებლობის“, - განაცხადა ბენიძემ.
EMC-ის იურისტის გურო იმნაძის თქმით, კანონის მიღების შემთხვევაში იქმნება სერიოზული რისკები ადამიანის უფლებების დაუსაბუთებელი შეზღუდვისთვის.
„ის ექსკლუზიური უფლებამოსილებები, რომლებიც აღმასრულებელ ხელისუფლებას გააჩნია მხოლოდამხოლოდ საგანგებო მდგომარეობისას, ამ კანონის შემთხვევაში, შეეძლება ნორმალურ ვითარებაშიც გამოიყენოს ეს ძალაუფლებები. რაც ნიშნავს, რომ აღმასრულებელი ხელისუფლება სხვა სახხელისუფლებო შტოებისგან დამოუკიდებლად იქნება უფლებამოსილი, რომ შეზღუდოს ისეთი უფლებები, როგორიცაა მიმოსვლის თავისუფლება, სხვადასხვა საქმიანობის უფლება, საკუთრების უფლება და ა.შ. რაც ცხადია პრობლემურია და ქმნის სერიოზულ რისკებს ადამიანის უფლებების დაუსაბუთებელი შეზღუდვისთვის“, - აცხადებს იმნაძე.
შეგახსენებთ, რომ მმართველი გუნდის წევრების ახალი ინიციატივის თანახმად, ახალი ინიციატივით, მმართველ გუნდს ქვეყანაში გადაადგილების აკრძალვა ყოველთვის შეეძლება, არ აქვს მნიშვნელობა იქნება თუ არა გამოცხადებული საგანგებო მდგომარეობა.
პრემიერ-მინისტრ გიორგი გახარიას თქმით, საჭიროა გარკვეული შეზღუდვების შენარჩუნება, თუმცა საგანგებო მდგომარეობა და კომენდანტის საათი ეპიდსიტუაციის გათვალისწინებით საჭირო აღარ არის. როგორც გახარიამ განმარტა კანონპროექტი არ გულისხმობს გამოხატვის თავისუფლების შეზღუდვას.
ოპოზიციონერი დეპუტატების განცხადებით, ხელისუფლება დიქტატურას ამყარებს და შემოტავაზებული ცვლილებები არაკონსტიტუციურია.
ხელისუფლების მიერ განუსაზღვრელი ძალაუფლების მინიჭებაზე საუბრობს იურისტი ლევან ალაფიშვილიც და აცხადებს, რომ ინიციატივა საკმაოდ სახიფათოა, ვინაიდან ხელისუფლებას საგანგებო მდგომარეობის გარეშეც ეძლევა შეზღუდვების დაწესების შესაძლებლობა.
კანონპროექტს სახალხო დამცველიც გამოეხმაურა და აღნიშნა, რომ შეზღუდვას თავისი კონსტიტუციური სტანდარტები აქვს, რაც კანონპროექტში ასახული და გათვალისწინებული არ არის.
დახურვა