ბაიდენი პუტინთან საუბარზე თანახმაა, იმ პირობით, რომ რუსეთი უკრაინაში არ შეიჭრება

აშშ-ის პრეზიდენტი ჯო ბაიდენი თანახმაა ესაუბროს ვლადიმერ პუტინს, იმ პირობით, რომ რუსეთი უკრაინაში არ შეიჭრება.

თეთრი სახლის პრესსპიკერი ჯენ ფსაკი ამბობს, რომ ბაიდენისა და პუტინის შეხვედრა მას შემდეგ გაიმართება, რაც 24 თებერვალს აშშ-ის სახელმწიფო მდივანი ენტონი ბლინკენი და რუსეთის საგარეო საქმეთა მინისტრი სერგეი ლავროვი შეხვდებიან.

თეთრი სახლის ინფორმაციით, ბაიდენისა და პუტინის შესაძლო შეხვედრას ბლინკენი და ლავროვი განიხილავენ.

თეთრ სახლში აცხადებენ, რომ ბაიდენისა და პუტინის შეხვედრის განრიგის ან ფორმატის შესახებ, ჯერ გეგმა არ არსებობს.

"ჩვენ ყოველთვის მზად ვართ დიპლომატიისთვის, ჩვენ ასევე მზად ვართ სწრაფი და მკაცრი შედეგებისთვის თუ რუსეთი ომს აირჩევს. ამჟამად რუსეთი როგორც ჩანს აგრძელებს მზადებას უკრაინაში სრული მასშტაბით ძალიან მალე შესაჭრელად." - ამბობს ჯენ ფსაკი.

ბაიდენსა და პუტინს შორის შესაძლო შეხვედრის შეთავაზება საფრანგეთის პრეზიდენტმა ემანუელ მაკრონმა გააკეთა. მაკრონმა თქვა, რომ პუტინი შეხვედრაზე თანახმაა.

შეგახსენებთ, CBS-ის ცნობით, აშშ-ის დაზვერვის ინფორმაციით, რუს გენერლებს უკრაინაში შეჭრის დაწყების ბრძანება მიღებული აქვთ.

ტელეკომპანიის ეროვნული უსაფრთხოების კორესპონდენტი დევიდ მარტინი CBS-ის ეთერში ამბობს, რომ ახლა გენერლები თავდასხმის გეგმაზე მუშაობენ.

მისივე თქმით, დაზვერვა მიუთითებს, რომ "[რუსები] აკეთებენ ყველაფერს, რასაც ამერიკელი გენერლები იზამდნენ შეტევის ბრძანების მიღების შემთხვევაში". 

დევიდ მარტინი ამ განცხადებისას საუბრობდა იმაზე, რატომაა პრეზიდენტი ჯო ბაიდენი დარწმუნებული, რომ რუსეთს უკრაინაში შეჭრა აქვს გადაწყვეტილი.

20 თებერვალს ბელარუსის თავდაცვის მინისტრმა თქვა, რომ უკრაინასთან ახლოს რუსეთთან ერთად სამხედრო წვრთნებს დაგეგმილზე მეტ ხანს გააგრძელებენ. ამასთან დაკავშირებით აშშ-ის სახელმწიფო მდივანმა ენტონი ბლინკენმა CNN-თან განაცხადა, რომ რუსეთის სცენარი უკრაინის დასაპყრობად წინ მიიწევს და ამის ერთ-ერთი ნიშანი სამხედრო წვრთნების გაგრძელებაა.

***

რუსეთ-უკრაინის საზღვართან ვითარება დაძაბულია. რამდენიმე თვეა, რუსეთმა აქ 100 ათასზე მეტი სამხედრო განალაგა. 

აშშ-ის პრეზიდენტის, ჯო ბაიდენის 18 თებერვლის განცხადებით, ის დარწმუნებულია, რომ ვლადიმერ პუტინმა უკრაინის დაპყრობის გადაწყვეტილება მიიღო. მისი თქმით, რუსეთი ამას მომდევნო კვირაში გააკეთებს, მიზანში კი დედაქალაქს, კიევს ამოიღებს. 

17 თებერვალს რუსულმა საოკუპაციო ძალებმა ლუგანსკის ოლქში, სტანიცა ლუგანსკის დასახლება საარტილერიო იარაღით დაბომბეს, ჭურვი საბავშვო ბაღსაც მოხვდა. თავდასხმის შედეგად, ბაღის სამი თანამშრომელი დაშავდა.

18 თებერვალს რუსეთის საოკუპაციო ძალებმა ცეცხლი ოკუპირებული ლუგანსკის რეგიონში გამშვებ პუნქტ Щастя-ს ცეცხლი გაუხსნეს. ამ დროს ადგილზე გაეროს ლტოლვილთა უმაღლესი კომისარიატის (UNHCR) ჰუმანიტარული დახმარების მანქანების კოლონა იმყოფებოდა. 

უკრაინის გაერთიანებული ძალების ინფორმაციით, მხოლოდ 19 თებერვალს  რუსეთის მხრიდან ცეცხლის შეწყვეტის შეთანხმების დარღვევის 136 შემთხვევა დაფიქსირდა, მათგან 116-ში რუსეთმა მინსკის შეთანხმებით აკრძალული იარაღი გამოიყენა.

მათი ინფორმაციით რუსეთის მხრიდან შეტევებს ორი უკრაინელი სამხედრო ემსხვერპლა, 4 კი დაიჭრა. 

ოკუპირებულ დონეცკისა და ლუგანსკის ოლქებში თვითგამოცხადებულმა ლიდერებმა ვითარების გამწვავების საბაბით 18 თებერვალს ევაკუაცია გამოცხადეს. 

ევაკუაციის გამოცხადებიდან მალევე, როსტოვის ოლქის ხელმძღვანელობამ განაცხადა, რომ ლტოლვილებისთვის ბანაკებს გაამზადებდნენ, ხოლო პრეზიდენტი ვლადიმირ პუტინი ყოველ მათგან 10 ათას რუბლს დაჰპირდა. გუშინ თვითგამოცხადებულ რესპუბლიკებს მხარდაჭერა გამოუცხადეს საქართველოს ოკუპირებული ტერიტორიების ე.წ ხელისუფლებამ. 

ოკუპირებული სოხუმის ე.წ მერმა ბესლან ეშბამ გუშინ განაცხადა, რომ საჭიროების შემთხვევაში სოხუმი დონეცკისა და ლუგანსკის თვითაღიარებული რესპუბლიკებიდან ევაკუირებული ადამიანების მისაღებად მზადაა.

ცხინვალის ოკუპაციური რეჟიმის ე.წ პრეზიდენტი, ანატოლი ბიბილოვი ე.წ დონეცკის სახალხო რესპუბლიკის თვითგამოცხადებულ ლიდერს, დენის პუშილინს ტელეფონით ესაუბრა და უთხრა, რომ ცხინვალი ობოლი ბავშვების მისაღებად მზადაა.

რამდენი ადამიანი აპირებს რუსეთში გადასვლას, უცნობია. ე.წ. დონეცკის სახალხო რესპუბლიკის პრეზიდენტმა, დენის პუშილინმა რუსულ სამთავრობო არხთან ინტერვიუს დროს თქვა, რომ სავარაუდოდ, ევაკუაცია ასი ათასობით ადამიანს შეეხება.

აღსანიშნავია, რომ რამდენიმე დღის წინ რუსეთის დუმამ პრეზიდენტ პუტინს ოკუპირებული ლუგანსკისა და დონეცკის დამოუკიდებლობა აღიარებისთვის მიმართა. დეპუტატებმა შესაბამის განკარგულებას დაუჭირეს მხარი. 

საპასუხოდ უკრაინის პარლამენტმა მიიღო რეზოლუცია, რომლითაც საერთაშორისო საზოგადოებას მოუწოდებს, არ აღიაროს რუსეთის მიღებული ნებისმიერი გადაწყვეტილება, რაც დროებით ოკუპირებული დონეცკისა და ლუგანსკის რეგიონებში არალეგალური, ე.წ რესპუბლიკების დამოუკიდებლობის აღიარებასთანაა დაკავშირებული.

დასავლეთი ვითარების დიპლომატიურ ფარგლებში გადატანას ჯერჯერობით უშედეგოდ ცდილობს. 

აშშ და NATO-ს წევრი სხვა ქვეყნები უკრაინას სამხედრო ტექნიკით, აღჭურვილობით და ტყვია-წამლით ეხმარებიან. გარდა ამისა, რუსეთს "არნახული" ეკონომიკური სანქციები ემუქრება აშშ-ის მხრიდან იმ შემთხვევაში, თუ ის უკრაინაში შეიჭრება. 

მას შემდეგ, რაც რუსეთმა უკრაინის საზღვართან ჯარები განალაგა, დასავლეთს პირობები წაუყენა: 

უკრაინის სიახლოვეს NATO-ს სამხედრო განლაგებების გაუქმება, ალიანსის გაფართოებაზე უარის თქმა და 2008 წლის ბუქარესტის სამიტზე მიღებული იმ გადაწყვეტილების უკან წაღება, რომლის თანახმადაც, უკრაინა და საქართველო აუცილებლად გახდებიან ალიანსის წევრები.

რუსეთი ასევე ითხოვს, ნატოს ჯარები გავიდნენ აღმოსავლეთ ევროპის ქვეყნებიდან და დაბრუნდნენ იქ, სადაც 1997 წლამდე იყვნენ, ანუ მანამ, სანამ ეს ქვეყნები ალიანსის წევრები გახდებოდნენ. 

აშშ-მ და ნატომ რუსეთთან დიალოგი სცადეს. რუსეთის წარმომადგენლები კვლავ ქვეყნის მოთხოვნებს იმეორებენ და ამბობენ, რომ თუ დასავლეთი ამას არ გაითვალისწინებს, შეთანხმება ვერ შედგება. დასავლეთი კი რუსეთის მოთხოვნებს არ ეთანხმება და არც მათ გათვალისწინებას აპირებს.