ლუგანსკის რეგიონის ხელმძღვანელის, სერგეი გაიდაის ინფორმაციით, რუსეთმა ლუგანსკის ქალაქ რუბიჟნეში ფოსფორის ბომბი გამოიყენა. შედეგად 4 ადამიანი დაიღუპა, 6 კი დაშავდა. დაღუპულთაგან 2 ბავშვია.
გაიდაი აცხადებს, რომ რუბიჟნეში შეტაკებები კვლავ მიმდინარეობს და სავარაუდოდ დაღუპულთა რიცხვი უფრო მაღალია.
„მძიმე მდგომარეობაა რუბიჟნეში, სადაც ქალაქის შუაგულში შეტაკებები გრძელდება. დადასტურებული ინფორმაციით, ჩვენ 4 დაღუპული გვყავს, რომელთაგან 2 ბავშვია და 6 ადამიანი დაჭრილია“, - აცხადებს გაიდაი.
სერგეი გაიდაი აცხადებს, რომ რუსული საოკუპაციო ძალები ლუგანსკის ქალაქებს: სევეროდონეცკის, ლისიჩანსკის, რუბიჟნეს, კრემენნაიას, ნოვოდრუჟესკის და ვოევოდივკას ბომბავენ.
მისი თქმით, ლუგანსკის ტერიტორიაზე გასულ 24 საათში მძიმე საჰაერო თავდასხმები მიმდინარეობდა. ადმინისტრაციის უფროსის ინფორმაციით ლუგანსკის რეგიონში გასულ დღე-ღამეში მთლიანად ან ნაწილობრივ განადგურდა 31 ობიექტი, მათგან 10 საცხოვრებელი კორპუსია, 13 კი კერძო სახლი.
ლუგანსკის ადმინისტრაციის ხელმძღვანელის ცნობით, 100 000-ზე მეტი მოქალაქე რეგიონში ელექტროენერგიის გარეშეა დარჩენილი.
დახურვა