უკრაინის არმიის მთავარსარდალი ვალერი ზალუჟნი აცხადებს, რომ უკრაინაში შეჭრის გასამართლებლად რუსეთი ოკუპირებული დონეცკისა და ლუგანსკის რეგიონებში მშვიდობიან მოსახლეობაზე ტერორისტულ თავდასხმებს გეგმავს.
„დროებით ოკუპირებული დონეცკისა და ლუგანსკის ტერიტორიებზე, რუსული სამხედრო პერსონალი და სადაზვერვო სამსახურები ტერორისტულ თავდასხმებს ამზადებენ, რომელთა მსხვერპლიც მოქალაქეები იქნებიან. მტერი ამის უკრაინის დადანაშაულების საბაბისთვის გამოყენებას აპირებს, რათა რუსეთის შეიარაღებული ძალები ადგილზე "მშვიდობისმყოფელთა" ნიღბით შეიყვანოს" - წერია ოფიციალურ განცხადებაში.
მთავარსარდალი ზალუჟნი აცხადებს, რომ რუსეთი ოკუპირებულ რეგიონებში მანქანების, საცხოვრებელი შენობებისა და საჯარო ადგილების დანაღმვას გეგმავს. გარდა ამისა, იგეგმება იმ ხიდებისა და გზების დანაღმვაც, რომლითაც ოკუპირებული ტერიტორიების თვითაღიარებული ადმინისტრაციები მოსახლეობის რუსეთში გადაყვანას გეგმავენ.
უკრაინის შეიარაღებული ძალების მთავარსარდალი აცხადებს, რომ განსაკუთრებული საფრთხის ქვეშ ის ავტობუსები და მატარებლებია, რითაც ადგილიდან ობოლი ბავშვებისა და მოხუცების წინასწარ გაწერილი განრიგითა და გზით გაყვანაა დაგეგმილი.
განცხადებაში მთავარსარდალმა კიდევ ერთხელ ხაზგასმით აღნიშნა, რომ უკრაინა დონბასზე არანაირ შეტევას არ გეგმავს და რუსეთი მიზანმიმართულად ავრცელებს დეზინფორმაციას.
მისი თქმით, აგრესორი რუსეთის კრიმინალური გეგმების გამოაშკარავებით უკრაინა ამ სცენარების ჩაშლას ცდილობს.
შეგახსენებთ, რომ უკრაინის გაერთიანებული ძალების ინფორმაციით, 19 თებერვლის მონაცემებით რუსეთის მხრიდან ცეცხლის შეწყვეტის შეთანხმების დარღვევის 101 შემთხვევა დაფიქსირდა, მათგან 88-ში რუსეთმა მინსკის შეთანხმებით აკრძალული იარაღი გამოიყენა.
მათი ინფორმაციით რუსეთის მხრიდან შეტევებს ორი უკრაინელი სამხედრო ემსხვერპლა, 4 კი დაიჭრა.
***
რუსეთ-უკრაინის საზღვართან ვითარება დაძაბულია. რამდენიმე თვეა, რუსეთმა აქ 100 ათასზე მეტი სამხედრო განალაგა.
აშშ-ის პრეზიდენტის, ჯო ბაიდენის 19 თებერვლის განცხადებით, ის დარწმუნებულია, რომ ვლადიმერ პუტინმა უკრაინის დაპყრობის გადაწყვეტილება მიიღო. მისი თქმით, რუსეთი ამას მომდევნო კვირაში გააკეთებს, მიზანში კი დედაქალაქს, კიევს ამოიღებს.
18 თებერვალს რუსეთის საოკუპაციო ძალებმა ცეცხლი ოკუპირებული ლუგანსკის რეგიონში გამშვებ პუნქტ Щастя-ს ცეცხლი გაუხსნეს. ამ დროს ადგილზე გაეროს ლტოლვილთა უმაღლესი კომისარიატის (UNHCR) ჰუმანიტარული დახმარების მანქანების კოლონა იმყოფებოდა.
უკრაინის შეიარაღებული ძალების ინფორმაციით, 17 თებერვალს რუსმა სამხედროებმა ცეცხლის შეწყვეტის შეთანხმება 60-ჯერ დაარღვიეს, მათგან 43 შემთხვევაში რუსეთმა მინსკის შეთანხმებით აკრძალული იარაღი გამოიყენა.
უკრაინის ინფორმაციით, თავდასხმების შედეგად 2 უკრაინელი სამხედრო და მინიმუმ 5 მოქალაქე დაზარალდა.
გარდა ამისა, 17 თებერვალს რუსულმა საოკუპაციო ძალებმა ლუგანსკის ოლქში, სტანიცა ლუგანსკის დასახლება საარტილერიო იარაღით დაბომბეს, ჭურვი საბავშვო ბაღსაც მოხვდა. თავდასხმის შედეგად, ბაღის სამი თანამშრომელი დაშავდა.
ოკუპირებულ დონეცკისა და ლუგანსკის ოლქებში თვითგამოცხადებულმა ლიდერებმა ვითარების გამწვავების საბაბით 18 თებერვალს ევაკუაცია გამოცხადეს.
ევაკუაციის გამოცხადებიდან მალევე, როსტოვის ოლქის ხელმძღვანელობამ განაცხადა, რომ ლტოლვილებისთვის ბანაკებს გაამზადებდნენ, ხოლო პრეზიდენტი ვლადიმირ პუტინი ყოველ მათგან 10 ათას რუბლს დაჰპირდა.
რამდენი ადამიანი აპირებს რუსეთში გადასვლას, უცნობია. ე.წ. დონეცკის სახალხო რესპუბლიკის პრეზიდენტმა, დენის პუშილინმა რუსულ სამთავრობო არხთან ინტერვიუს დროს თქვა, რომ სავარაუდოდ, ევაკუაცია ასი ათასობით ადამიანს შეეხება.
აღსანიშნავია, რომ რამდენიმე დღის წინ რუსეთის დუმამ პრეზიდენტ პუტინს ოკუპირებული ლუგანსკისა და დონეცკის დამოუკიდებლობა აღიარებისთვის მიმართა. დეპუტატებმა შესაბამის განკარგულებას დაუჭირეს მხარი.
საპასუხოდ უკრაინის პარლამენტმა მიიღო რეზოლუცია, რომლითაც საერთაშორისო საზოგადოებას მოუწოდებს, არ აღიაროს რუსეთის მიღებული ნებისმიერი გადაწყვეტილება, რაც დროებით ოკუპირებული დონეცკისა და ლუგანსკის რეგიონებში არალეგალური, ე.წ რესპუბლიკების დამოუკიდებლობის აღიარებასთანაა დაკავშირებული.
დასავლეთი ვითარების დიპლომატიურ ფარგლებში გადატანას ჯერჯერობით უშედეგოდ ცდილობს.
აშშ და NATO-ს წევრი სხვა ქვეყნები უკრაინას სამხედრო ტექნიკით, აღჭურვილობით და ტყვია-წამლით ეხმარებიან. გარდა ამისა, რუსეთს "არნახული" ეკონომიკური სანქციები ემუქრება აშშ-ის მხრიდან იმ შემთხვევაში, თუ ის უკრაინაში შეიჭრება.
მას შემდეგ, რაც რუსეთმა უკრაინის საზღვართან ჯარები განალაგა, დასავლეთს პირობები წაუყენა:
უკრაინის სიახლოვეს NATO-ს სამხედრო განლაგებების გაუქმება, ალიანსის გაფართოებაზე უარის თქმა და 2008 წლის ბუქარესტის სამიტზე მიღებული იმ გადაწყვეტილების უკან წაღება, რომლის თანახმადაც, უკრაინა და საქართველო აუცილებლად გახდებიან ალიანსის წევრები.
რუსეთი ასევე ითხოვს, ნატოს ჯარები გავიდნენ აღმოსავლეთ ევროპის ქვეყნებიდან და დაბრუნდნენ იქ, სადაც 1997 წლამდე იყვნენ, ანუ მანამ, სანამ ეს ქვეყნები ალიანსის წევრები გახდებოდნენ.
აშშ-მ და ნატომ რუსეთთან დიალოგი სცადეს. რუსეთის წარმომადგენლები კვლავ ქვეყნის მოთხოვნებს იმეორებენ და ამბობენ, რომ თუ დასავლეთი ამას არ გაითვალისწინებს, შეთანხმება ვერ შედგება. დასავლეთი კი რუსეთის მოთხოვნებს არ ეთანხმება და არც მათ გათვალისწინებას აპირებს.
დახურვა