კიევის მერის, ვიტალი კლიჩკოს განცხადებით, ოკუპანტების მიერ კიევში, საცხოვრებელ კორპუსზე განხორციელებულ თავდასხმას 6 თვის ორსული ემსხვერპლა.
"კიევის ცენტრში, საცხოვრებელ კორპუსში მიმდინარე სამძებრო-სამაშველო სამუშაოების დროს სამი მშვიდობიანი მოქალაქის ცხედარი ამოიყვანეს. მათ შორისაა ახალგაზრდა წყვილი, ცოლ-ქმარი, ისინი ბავშვს ელოდებოდნენ. ქალი 6 თვის ორსული იყო", - წერს კლიჩკო.
17 ოქტომბერს დილით რუსეთმა კიევზე თავდასხმა განახორციელა. ერთ-ერთი აფეთქება მოხდა შევჩენკივსკის რაიონში, უკრაინის დედაქალაქის ცენტრში. ვიტალი კლიჩკოს განცხადებით, რუსეთმა კიევი "კამიკაძე" დრონებით დაბომბა.
კიევის მერმა განაცხადა, რომ კიევზე განხორციელებული თავდასხმისას ერთ-ერთი ირანული დრონი საცხოვრებელ სახლს მოხვდა. ბოლო მონაცემებით, დაიღუპა 3, ხოლო დაშავდა 4 ადამიანი.
უკრაინის შინაგან საქმეთა მინისტრის მრჩევლის ანტონ გერაშენკოს ინფორმაციით, რუსეთის იერიშის სამიზნე კიევში მდებარე კრიტიკული ინფრასტრუქტურის ობიექტები იყო.
დახურვა