ხაჭაპურიძის აზრით, სააკაშვილს ისევ ციხეში ან გლდანის სამკურნალო დაწესებულებაში გადაიყვანენ

ვივამედის განცხადების შემდეგ, მიხეილ სააკაშვილის ადვოკატი, შალვა ხაჭაპურიძე ფიქრობს, რომ ექსპრეზიდენტი, შესაძლოა, ციხეში ან გლდანის მე-18 დაწესებულებაში გადაიყვანონ. ამის შესახებ მან პალიტრანიუსის ეთერში ისაუბრა.

"თუ დააკვირდებოდით, ბოლო 3-4 კვირის განმავლობაში, თავს ვიკავებდით ყოველგვარი განცხადების გაკეთებისგან, არავითარი აქტივობა ჩვენი მხრიდან არ ყოფილა. დღეს, ვივამედმა გაავრცელა ეს განცხადება. დასკვნის გამოტანა ძალიან მარტივია, კიდევ ახალი პროვოკაციაა დაგეგმილი სააკაშვილის მიმართ.

მე არ მგონია, რომ აქ საზღვარგარეთ გადაყვანაზე იყოს საუბარი, იმიტომ, რომ ამის შესახებ მე და სააკაშვილის ოჯახის წევრებს გვეცოდინებოდა. ეცოდინებოდა, თავად სააკაშვილის. ახლახან ვესაუბრე ქალბატონ გიულის და მისთვის მსგავსი რამ ინფორმაცია ცნობილი არ არის. პირიქით, გამიზნულია, რომ სააკაშვილი გადაიყვანონ ან ციხეში ან გლდანის მე-18 ე.წ. სამკურნალო დაწესებულებაში, რაც სააკაშვილისთვის იქნება სასიკვდილო განაჩენის გამოტანა", - განაცხადა ხაჭაპურიძემ.

კლინიკის განცხადებაზე კომენტარი გააკეთა სააკაშვილის დედამ, გიული ალასანიამაც და აღნიშნა, რომ ვივამედი გადაწყვეტილებებს იღებს არა დამოუკიდებლად, არამედ პენიტენციური სისტემის ბრძანების შესაბამისად. ალასანიაც ფიქრობს, რომ სააკაშვილის ციხეში დააბრუნებენ.

დღეს კლინიკა ვივამედმა მიხეილ სააკაშვილთან დაკავშირებით განცხადება გაავრცელა და აღნიშნა, რომ "სავარაუდოდ, იძულებულები" ხდებიან, მიმართონ პენიტენციურ დაწესებულების სამედიცინო სამსახურს, შეაფასოს პაციენტის კლინიკაში შემდგომი დაყოვნების მიზანშეწონილობა. მათი თქმით, სააკაშვილი 2022 წლის 12 მაისიდან იმყოფება კლინიკაში და ამ დროის განმავლობაში ჩაუტარდა გამოკვლევების სრული სპექტრი, დაესვა დიაგნოზი და განესაზღვრა მკურნალობის სქემა, თუმცა მათი მტკიცებით, სააკაშვილი უარს აცხადებს შეთავაზებულ მკურნალობაზე.

სახალხო დამცველის კონსილიუმის ბოლო დასკვნაში აღნიშნულია, რომ მიხეილ სააკაშვილი კიდევ 5-7 კილოგრამის დაკლების შემთხვევაში, საწოლზე მიჯაჭვული გახდება. მათი თქმით, ამ სისწრაფით წონის კლებისას მოსალოდნელია ამ ნიშნულამდე მიღწევა 1-2 თვეში.

დასკვნის თანახმად, მისთვის კრიტიკულ წონას წარმოადგენს 52-53 კილოგრამი, რის შემდეგადაც დაიწყება ორგანიზმის შეუქცევადი ცვლილებები. კონსილიუმის შეფასებით, სააკაშვილს აქვს სარკოპენია, კუნთების განლევა, კახექსიის მძიმე მე-4 სტადია, ასევე, ორთოსტატიული წნევის კრიტიკული ვარდნა კოორდინაციის მოშლით.

მე-4 ხარისხის კახექსიით მიხეილ სააკაშვილის მდგომარეობა ომბუდსმენის კონსილიუმის წინა დასკვნაშიც არის შეფასებული და აღნიშნულია, რომ ის სხვა ქვეყნის მრავალპროფილურ კლინიკაშია გადასაყვანი. ადვოკატები ამბობენ, რომ მიხეილ სააკაშვილის მასის ინდექსი ჩამოსცდა 18-ს. მათი შეფასებით, მისი მდგომარეობა საგანგაშოა და საჭიროებს რეანიმაციულ განყოფილებაში მკურნალობას.