ჩვენ რაც შევთავაზეთ ოპოზიციას, ყველაფერი არის საჯარო. ჩვენ შევთავაზეთ მათ შედეგების გადათვლა, გადამოწმება და კიდევ ერთხელ ვთავაზობთ ამ ყველაფერს, მათ შორის საგამოძიებო კომისიის ფარგლებში. თუ ისინი აღმოაჩენენ თუნდაც მიზერულ გადახრას, ამ შემთხვევაში ჩვენ მზად ვართ, დავნიშნოთ რიგგარეშე არჩევნები. თუმცა, მათ აქვთ ძალიან მოკრძალებული პოზიცია ამ წინადადებასთან დაკავშირებით, იმიტომ, რომ ეშინიათ. ეშინიათ იმის გამო, რომ რეალურად იციან, რომ არჩევნები არ გაყალბებულა საქართველოში. ისინი ვერ აღმოაჩენენ ვერც 1-პროცენტიან და ვერც 0.1-პროცენტიან გადახრას ქართული ოცნების სასარგებლოდ. არჩევნების გაყალბება იყო მათი პრაქტიკა და ეს პრაქტიკა 2012 წლიდან აღიკვეთა საქართველოში.
ამის შესახებ საპარლამენტო უმრავლესობის წევრმა ირაკლი კობახიძემ ჟურნალისტებს განუცხადა.
ცნობისთვის, მე-10 მოწვევის პარლამენტს ოპოზიციური პარტიები ბოიკოტს უცხადებენ, ვინაიდან 31 ოქტომბრის არჩევნების შედეგებს გაყალბებულად მიიჩნევენ და რიგგარეშე არჩევნების ჩატარებას ითხოვენ. ოპოზიციის მოთხოვნებს შორის არის საარჩევნო ადმინისტრაციის ცვლილება და პოლიტიკური პატიმრების გათავისუფლება, ასევე, საარჩევნო სისტემის რეფორმა.
ოპოზიციას და ხელისუფლებას შორის, დასავლელი ელჩების ფასილიტაციით, მოლაპარაკებების 4 რაუნდი ჩატარდა, თუმცა, უშედეგოდ. ხელისუფლება ჯერჯერობით მხოლოდ საარჩევნო სისტემის რეფორმას თანხმდება.
დახურვა
