უკრაინის თავდაცვის სამინისტროს ინფორმაციით, კანადამ უკრაინას დამატებითი სამხედრო აღჭურვილობა და საბრძოლო იარაღი გადასცა.
სამინისტროს ოფიციალურ განცხადებაში წერია, რომ 19 თებერვალს კანადის საჰაერო თავდაცვის ხომალდი C-17 ლვოვის საერთაშორისო აეროპორტში ჩაფრინდა და უკრაინის შეიარაღებულ ძალებს სამხედრო დახმარება ჩაუტანა, რაც სნაიპერებს, ავტომატურ და მექანიკურ იარაღებს, ღამის ხედვისა და სათვალთვალო აღჭურვილობასა და სამხედრო მოწყობილობებს მოიცავს.
ეს სამხედრო დახმარება უკრაინის თავდაცვის სამინისტროსა და კანადის შეიარაღებული ძალების ეროვნული თავდაცვის დეპარტამენტს შორის დადებული ხელშეკრულების ნაწილია, რაც უკრაინაში სამხედრო წვრთნებსაც ითვალისწინებს.
უკრაინა მადლობას უხდის მეგობარ კანადას პარტნიორობისა და სამხედრო მხარდაჭერისთვის.
„ჩვენ მადლობას ვუხდით ჩვენს პარტნიორებსა და მეგობრებს ამ მნიშვნელოვანი და დროული გაწყვეტილებისთვის. განსაკუთრებული მადლობა ეროვნული თავდაცვის მინისტრ ანიტა ანანდს უკრაინის მხარდაჭერაში მისი ურყევი პოზიციისთვის“ - განაცხადა უკრაინის თავდაცვის მინისტრმა ოლექსეი რეზნიკოვმა.
რეზნიკოვის თქმით, კანადელ მწვრთნელებთან ერთად უკრაინელი სამხედროები ტაქტიკურ და სხვა ტიპის წვრთნებს ლვოვში ერთად გაივლიან და ერთმანეთს საჭირო უნარებსა და გამოცდილებას გაუზიარებენ.
უკრაინამ კანადისგან სამხედრო დახმარება უკვე მეორედ მიიღო. თავდაცვის სამინისტროს ინფორმაციით, უახლოეს მომავალში კანადიდან დამატებითი აღჭურვილობით დატვირთულ სხვა ფრენებსაც ელიან.
***
რუსეთ-უკრაინის საზღვართან ვითარება დაძაბულია. რამდენიმე თვეა, რუსეთმა აქ 100 ათასზე მეტი სამხედრო განალაგა.
აშშ-ის პრეზიდენტის, ჯო ბაიდენის 18 თებერვლის განცხადებით, ის დარწმუნებულია, რომ ვლადიმერ პუტინმა უკრაინის დაპყრობის გადაწყვეტილება მიიღო. მისი თქმით, რუსეთი ამას მომდევნო კვირაში გააკეთებს, მიზანში კი დედაქალაქს, კიევს ამოიღებს.
17 თებერვალს რუსულმა საოკუპაციო ძალებმა ლუგანსკის ოლქში, სტანიცა ლუგანსკის დასახლება საარტილერიო იარაღით დაბომბეს, ჭურვი საბავშვო ბაღსაც მოხვდა. თავდასხმის შედეგად, ბაღის სამი თანამშრომელი დაშავდა.
18 თებერვალს რუსეთის საოკუპაციო ძალებმა ცეცხლი ოკუპირებული ლუგანსკის რეგიონში გამშვებ პუნქტ Щастя-ს ცეცხლი გაუხსნეს. ამ დროს ადგილზე გაეროს ლტოლვილთა უმაღლესი კომისარიატის (UNHCR) ჰუმანიტარული დახმარების მანქანების კოლონა იმყოფებოდა.
უკრაინის გაერთიანებული ძალების ინფორმაციით, მხოლოდ 19 თებერვალს რუსეთის მხრიდან ცეცხლის შეწყვეტის შეთანხმების დარღვევის 136 შემთხვევა დაფიქსირდა, მათგან 116-ში რუსეთმა მინსკის შეთანხმებით აკრძალული იარაღი გამოიყენა.
მათი ინფორმაციით რუსეთის მხრიდან შეტევებს ორი უკრაინელი სამხედრო ემსხვერპლა, 4 კი დაიჭრა.
ოკუპირებულ დონეცკისა და ლუგანსკის ოლქებში თვითგამოცხადებულმა ლიდერებმა ვითარების გამწვავების საბაბით 18 თებერვალს ევაკუაცია გამოცხადეს.
ევაკუაციის გამოცხადებიდან მალევე, როსტოვის ოლქის ხელმძღვანელობამ განაცხადა, რომ ლტოლვილებისთვის ბანაკებს გაამზადებდნენ, ხოლო პრეზიდენტი ვლადიმირ პუტინი ყოველ მათგან 10 ათას რუბლს დაჰპირდა. გუშინ თვითგამოცხადებულ რესპუბლიკებს მხარდაჭერა გამოუცხადეს საქართველოს ოკუპირებული ტერიტორიების ე.წ ხელისუფლებამ.
ოკუპირებული სოხუმის ე.წ მერმა ბესლან ეშბამ გუშინ განაცხადა, რომ საჭიროების შემთხვევაში სოხუმი დონეცკისა და ლუგანსკის თვითაღიარებული რესპუბლიკებიდან ევაკუირებული ადამიანების მისაღებად მზადაა.
ცხინვალის ოკუპაციური რეჟიმის ე.წ პრეზიდენტი, ანატოლი ბიბილოვი ე.წ დონეცკის სახალხო რესპუბლიკის თვითგამოცხადებულ ლიდერს, დენის პუშილინს ტელეფონით ესაუბრა და უთხრა, რომ ცხინვალი ობოლი ბავშვების მისაღებად მზადაა.
რამდენი ადამიანი აპირებს რუსეთში გადასვლას, უცნობია. ე.წ. დონეცკის სახალხო რესპუბლიკის პრეზიდენტმა, დენის პუშილინმა რუსულ სამთავრობო არხთან ინტერვიუს დროს თქვა, რომ სავარაუდოდ, ევაკუაცია ასი ათასობით ადამიანს შეეხება.
აღსანიშნავია, რომ რამდენიმე დღის წინ რუსეთის დუმამ პრეზიდენტ პუტინს ოკუპირებული ლუგანსკისა და დონეცკის დამოუკიდებლობა აღიარებისთვის მიმართა. დეპუტატებმა შესაბამის განკარგულებას დაუჭირეს მხარი.
საპასუხოდ უკრაინის პარლამენტმა მიიღო რეზოლუცია, რომლითაც საერთაშორისო საზოგადოებას მოუწოდებს, არ აღიაროს რუსეთის მიღებული ნებისმიერი გადაწყვეტილება, რაც დროებით ოკუპირებული დონეცკისა და ლუგანსკის რეგიონებში არალეგალური, ე.წ რესპუბლიკების დამოუკიდებლობის აღიარებასთანაა დაკავშირებული.
დასავლეთი ვითარების დიპლომატიურ ფარგლებში გადატანას ჯერჯერობით უშედეგოდ ცდილობს.
აშშ და NATO-ს წევრი სხვა ქვეყნები უკრაინას სამხედრო ტექნიკით, აღჭურვილობით და ტყვია-წამლით ეხმარებიან. გარდა ამისა, რუსეთს "არნახული" ეკონომიკური სანქციები ემუქრება აშშ-ის მხრიდან იმ შემთხვევაში, თუ ის უკრაინაში შეიჭრება.
მას შემდეგ, რაც რუსეთმა უკრაინის საზღვართან ჯარები განალაგა, დასავლეთს პირობები წაუყენა:
უკრაინის სიახლოვეს NATO-ს სამხედრო განლაგებების გაუქმება, ალიანსის გაფართოებაზე უარის თქმა და 2008 წლის ბუქარესტის სამიტზე მიღებული იმ გადაწყვეტილების უკან წაღება, რომლის თანახმადაც, უკრაინა და საქართველო აუცილებლად გახდებიან ალიანსის წევრები.
რუსეთი ასევე ითხოვს, ნატოს ჯარები გავიდნენ აღმოსავლეთ ევროპის ქვეყნებიდან და დაბრუნდნენ იქ, სადაც 1997 წლამდე იყვნენ, ანუ მანამ, სანამ ეს ქვეყნები ალიანსის წევრები გახდებოდნენ.
აშშ-მ და ნატომ რუსეთთან დიალოგი სცადეს. რუსეთის წარმომადგენლები კვლავ ქვეყნის მოთხოვნებს იმეორებენ და ამბობენ, რომ თუ დასავლეთი ამას არ გაითვალისწინებს, შეთანხმება ვერ შედგება. დასავლეთი კი რუსეთის მოთხოვნებს არ ეთანხმება და არც მათ გათვალისწინებას აპირებს.
დახურვა