პარლამენტის თავმჯდომარე, შალვა პაპუაშვილი საკანონმდებლო ორგანოში გაძლიერებულ უსაფრთხოების რეჟიმს იმით ხსნის, რომ ძალადობა "პოლიტიკურ ინსტრუმენტად იქცა". ასე მიმართა მან ბიუროს სხდომაზე ოპოზიციის წარმომადგენლებს და არაფერი უთქვამს გუშინ ქართული ოცნების დეპუტატების მხრიდან განხორციელებულ სიტყვიერ თუ ფიზიკურ შეურაცხყოფებზე.
"გუშინაც, სამწუხაროდ, პარლამენტის წევრების მხრიდან, იქნებოდა ეს მანდატურების თუ სახელმწიფო დაცვის სპეციალური სამსახურის თანამშრომლების მიმართ, დამუნათება, მორალის კითხვა ა.შ. გთხოვთ, შევეშვათ ამას, პატივი ვცეთ.
ქალბატონო ხათუნა, მე მგონი, ყველას მოგიწოდებთ, ცოტა გარედან შევხედოთ საკუთარ თავს და რაც ხდებოდა, არ ვიცი, მაგიდების აყირავება ნახეთ, ძალადობა ვნახეთ, მოქალაქეებზე ძალადობაც ვნახეთ, თქვენი მხრიდანაც ვნახეთ ქალბატონო სალომე და ასე შემდეგ. მოკლედ კიდევ ერთხელ, დღესაც არის სპეციალური რეჟიმი, პატივი ვცეთ ამას, არავის არ სიამოვნებს გაძლიერებული უსაფრთხოების რეჟიმი, მაგრამ როდესაც ძალადობა არის პოლიტიკურ ინსტრუმენტად ქცეული, აქ საჭიროა უსაფრთხოების დაცვა", - განაცხადა პაპუაშვილმა.
გუშინ იურიდიულ საკითხთა კომიტეტზე რუსულ კანონს განიხილავდნენ. სხდომა დილიდან ხმაურის ფონზე მიმდინარეობდა, იყო სიტყვიერი და ფიზიკური დაპირისპირება. მათ შორის, ქართული ოცნების დეპუტატმა და ამავე კომიტეტის თავმჯდომარემ ანრი ოხანაშვილმა ნაციონალური მოძრაობის თავმჯდომარეს ლევან ხაბეიშვილს ფიზიკური შეურაცხყოფა მიაყენა. ოპოზიციონერი დეპუტატების ნაწილი სხდომის დარბაზიდან ძალის გამოყენებით გამოაძევეს და აღარ უშვებდნენ, შეზღუდული იყო პარლამენტში გადაადგილებაც. პარალელურად, საპროტესტო აქცია მიმდინარეობდა პარლამენტის გარეთ.
ქართული ოცნებიდან ფორმალურად წასულმა დეპუტატებმა, რომლებიც საკუთარ თავს "ხალხის ძალას" უწოდებენ, დააინიციირეს კანონპროექტი, რომელიც საქართველოში "უცხოური გავლენის აგენტებს" გააჩენს. ეს კანონი შეეხება ყველას, ვინც ხელისუფლებას აკრიტიკებს. "უცხოური გავლენის აგენტებად" დარეგისტრირდებიან ორგანიზაციები და მედიასაშუალებები, რომელთა შემოსავლის 20%-ზე მეტი უცხოური წყაროა.
ქართული ოცნება მხარს უჭერს კანონპროექტს. მმართველ პარტიაში აცხადებენ, რომ მსგავსი კანონი აშშ-შიც მოქმედებს, ამავე არგუმენტს იყენებდა რუსეთიც. თუმცა ისინი მანიპულირებენ, როდესაც ამერიკული კანონის მოქმედების დეტალებზე არ საუბრობენ. ამერიკული კანონი სხვა სახელმწიფოების პოლიტიკური ლობიზმის გამოსავლენადაა მიმართული, განსხვავებით ქართული ოცნების რუსული კანონისგან.
მმართველი პარტიის წევრები რუსულ კანონში პრობლემას ვერ ხედავენ, თუმცა კანონპროექტს აკრიტიკებენ საერთაშორისო პარტნიორები, სამოქალაქო საზოგადოების წარმომადგენლები და სხვადასხვა ქვეყნის ელჩები.
კანონპროექტის შესახებ აშშ-ის სახელმწიფო დეპარტამენტის პრესსპიკერმა, ნედ პრაისმა განაცხადა, რომ რუსული კანონი უცხოური გავლენის აგენტებზე სტიგმატიზებას მოახდენს და "გააჩუმებს საქართველოს მოქალაქეების დამოუკიდებელ ხმებს".
28 თებერვალს კი აშშ-ის სახელმწიფო დეპარტამენტმა გაავრცელა ინფორმაცია, რომ სახელმწიფო მდივნის თანაშემწემ ერინ ბარკლიმ ჟენევაში საქართველოს საგარეო საქმეთა მინისტრს შეხვედრისას უთხრა, რომ კანონპროექტი, რომელიც არასამთავრობო ორგანიზაციებისა და მედიის წინააღმდეგაა მიმართული "საქართველოს ევროინტეგრაციას ძირს გამოუთხრის".
რუსულ კანონზე საქართველოში ამერიკის ელჩმა, კელი დეგნანმა განაცხადა, რომ კანონპროექტის მიზანი სამოქალაქო საზოგადოების სტიგმატიზაციაა. ის გააკრიტიკა საქართველოში ევროკავშირის ელჩმაც და აღნიშნა, რომ კანონი ევროკავშირის 12 პრიორიტეტთან შეუთავსებელია. რუსულ კანონს გამოეხმაურა ევროკავშირის საგარეო უწყებაც და განაცხადა, რომ ეს შემაშფოთებელია.
ამას Twitter-ზე გამოეხმაურა ნორვეგიის საგარეო საქმეთა სამინისტროც და განაცხადა, რომ კანონი ქვეყნების თანამშრომლობაზე უარყოფითად აისახება. უწყების თქმით, კანონპროექტი ეწინააღმდეგება ქართველი ხალხის მტკიცე ევროპულ მისწრაფებებსა და ადამიანის უფლებების საერთაშორისო ვალდებულებებს. ნორვეგიამ კანონმდებლებს მოუწოდა, საქართველოს დემოკრატიის ინტერესებიდან გამომდინარე იმოქმედონ.
კანონპროექტი გააკრიტიკა ევროპის საბჭოს ადამიანის უფლებათა კომისარმა - მან საქართველოს პარლამენტის თავმჯდომარეს, შალვა პაპუაშვილს ოფიციალური წერილით მიმართა და მოუწოდა, კანონის მიღებაზე უარი თქვას. მისი განცხადებით, კანონს, შესაძლოა, სერიოზული მსუსხავი ეფექტი ჰქონდეს ადამიანის უფლებების, დემოკრატიისა და კანონის უზენაესობის სფეროში აქტიურად მომუშავე არასამთავრობო ორგანიზაციათა საქმიანობაზე.
დახურვა