7 მარტს 09:00 საათზე პარლამენტის შენობასთან აქცია გაიმართება.
10 საათზე საკანონმდებლო ორგანოში ბიუროს სხდომაა ჩანიშნული, რომელიც დღეს უნდა ჩატარებულიყო.
როგორც ენმ-ის წევრმა ხატია დეკანოიძემ ოპოზიციისა და არასამთავრობო ორგანიზაციების შეხვედრის შემდეგ ჟურნალისტებთან აღნიშნა, ამ დღეების განმავლობაში მიმდინარე აქციებმა შედეგად მოტანა ის, რომ დღეს ბიუროს სხდომა არ ჩატარდა, თუმცა მისივე თქმით, "ამით ყველაფერი არ დასრულებულა" და ქართულმა ოცნებამ უნდა დაინახოს, რომ საქართველოში არიან ადამიანები, ვისაც რუსეთში ცხოვრება არ სურს.
"ყველას გელოდებით ხვალ 9 საათზე პარლამენტთან. 10 საათზე არის ბიუროს სხდომა და მნიშვნელოვანია, რომ ვაჩვენოთ მათ შორის ქართულ ოცნებას, რომ ვარსებობთ ამ ქვეყანაში ადამიანები, ვისაც არ სურს რუსეთი და ეს ქვეყანა არ იქნება რუსეთი. ჩვენ გავაგრძელებთ პარლამენტის შიგნით და გარეთ"- თქვა დეკანოიძემ.
პარლამენტის იურიდიულმა კომიტეტმა რუსულ კანონპროექტს მხარი დაუჭირა.
დღეს, დილის 10:00 საათიდან კომიტეტზე რუსული კანონპროექტის განხილვის პარალელურად, პარლამენტის შენობასთან აქცია მიმდინარეობდა.
პარლამენტის სხდომათა დარბაზში კი ოპოზიციონერ დეპუტატებსა და ქართული ოცნების წევრებს შორის სიტყვიერი და ფიზიკური დაპირისპირება იყო.
ოცნების დეპუტატმა და იურიდიულ საკითხთა კომიტეტის თავმჯდომარემ, ანრი ოხანაშვილმა ლევან ხაბეიშვილს ფიზიკური შეურაცხყოფა მიაყენა.
ოპოზიციონერი დეპუტატების ნაწილი სხდომის დარბაზიდან ძალის გამოყენებით გამოაძევეს.
***
ქართული ოცნებიდან ფორმალურად წასულმა დეპუტატებმა, რომლებიც საკუთარ თავს "ხალხის ძალას" უწოდებენ, დააინიციირეს კანონპროექტი, რომელიც საქართველოში "უცხოური გავლენის აგენტებს" გააჩენს. ეს კანონი შეეხება ყველას, ვინც ხელისუფლებას აკრიტიკებს. "უცხოური გავლენის აგენტებად" დარეგისტრირდებიან ორგანიზაციები და მედიასაშუალებები, რომელთა შემოსავლის 20%-ზე მეტი უცხოური წყაროა.
ქართული ოცნება მხარს უჭერს კანონპროექტს. მმართველ პარტიაში აცხადებენ, რომ მსგავსი კანონი აშშ-შიც მოქმედებს, ამავე არგუმენტს იყენებდა რუსეთიც. თუმცა ისინი მანიპულირებენ, როდესაც ამერიკული კანონის მოქმედების დეტალებზე არ საუბრობენ. ამერიკული კანონი სხვა სახელმწიფოების პოლიტიკური ლობიზმის გამოსავლენადაა მიმართული, განსხვავებით ქართული ოცნების რუსული კანონისგან.
მმართველი პარტიის წევრები რუსულ კანონში პრობლემას ვერ ხედავენ, თუმცა კანონპროექტს აკრიტიკებენ საერთაშორისო პარტნიორები, სამოქალაქო საზოგადოების წარმომადგენლები და სხვადასხვა ქვეყნის ელჩები.
კანონპროექტის შესახებ აშშ-ის სახელმწიფო დეპარტამენტის პრესსპიკერმა, ნედ პრაისმა განაცხადა, რომ რუსული კანონი უცხოური გავლენის აგენტებზე სტიგმატიზებას მოახდენს და "გააჩუმებს საქართველოს მოქალაქეების დამოუკიდებელ ხმებს".
28 თებერვალს კი აშშ-ის სახელმწიფო დეპარტამენტმა გაავრცელა ინფორმაცია, რომ სახელმწიფო მდივნის თანაშემწემ ერინ ბარკლიმ ჟენევაში საქართველოს საგარეო საქმეთა მინისტრს შეხვედრისას უთხრა, რომ კანონპროექტი, რომელიც არასამთავრობო ორგანიზაციებისა და მედიის წინააღმდეგაა მიმართული "საქართველოს ევროინტეგრაციას ძირს გამოუთხრის".
რუსულ კანონზე საქართველოში ამერიკის ელჩმა, კელი დეგნანმა განაცხადა, რომ კანონპროექტის მიზანი სამოქალაქო საზოგადოების სტიგმატიზაციაა. ის გააკრიტიკა საქართველოში ევროკავშირის ელჩმაც და აღნიშნა, რომ კანონი ევროკავშირის 12 პრიორიტეტთან შეუთავსებელია. რუსულ კანონს გამოეხმაურა ევროკავშირის საგარეო უწყებაც და განაცხადა, რომ ეს შემაშფოთებელია.
ამას Twitter-ზე გამოეხმაურა ნორვეგიის საგარეო საქმეთა სამინისტროც და განაცხადა, რომ კანონი ქვეყნების თანამშრომლობაზე უარყოფითად აისახება. უწყების თქმით, კანონპროექტი ეწინააღმდეგება ქართველი ხალხის მტკიცე ევროპულ მისწრაფებებსა და ადამიანის უფლებების საერთაშორისო ვალდებულებებს. ნორვეგიამ კანონმდებლებს მოუწოდა, საქართველოს დემოკრატიის ინტერესებიდან გამომდინარე იმოქმედონ.
კანონპროექტი გააკრიტიკა ევროპის საბჭოს ადამიანის უფლებათა კომისარმა - მან საქართველოს პარლამენტის თავმჯდომარეს, შალვა პაპუაშვილს ოფიციალური წერილით მიმართა და მოუწოდა, კანონის მიღებაზე უარი თქვას. მისი განცხადებით, კანონს, შესაძლოა, სერიოზული მსუსხავი ეფექტი ჰქონდეს ადამიანის უფლებების, დემოკრატიისა და კანონის უზენაესობის სფეროში აქტიურად მომუშავე არასამთავრობო ორგანიზაციათა საქმიანობაზე.
დახურვა